Sekula ke bedau bisi Kelab Penguna tau ngerejista ngagai KPDNHEP
KUCHING: Sekula di nengeri tu ke bedau numbuhka ‘Kelab Pengguna Sekolah’ diperansang ngerejista diri enggau Opis Menteri Dagang Dalam Nengeri enggau Pekara Pengguna (KPDNHEP).
Direktor KPDNHEP Sarawak, Datuk Stanley Tan madahka laban opis menteri begulai enggau Opis Menteri Pelajar nengah Opis Pelajar ba nengeri tu bisi ngaga kerejasama ngatur program baka ‘Cabaran Interaktif Pengguna, Kelab Pengguna Sekolah’ (CIPKPS).
Nitih ku iya, Program CIPKPS dipejalaika kenyau ari taun 1996, ke lalu nyadi program ninting taun begulai enggau sekula.
“Tuju kitai ngatur program tu laban deka meri penemu ngagai nembiak bekaul enggau pekara penguna. Kitai deka ke nembiak nemu agi sereta nyadi penguna ti landik.
“Tu siti ari chara kitai ngelaku lalu kitai deka meda mayuh agi sekula ba Sarawak ngambi bagi sereta numbuhka Kelab Penguna Sekula.
“Kitai ngarapka sekula ke bedau numbuhka Kelab Penguna tu tau ngerejista diri ngagai KPDNHEP awakka program tu ngerembai ngagai serata nengeri Sarawak,” ku iya.
Stanley mansutka pekara tu lebuh dikerandau ba aum pengarang berita, pengudah nutup pengerami CIPKPS Zon Selatan ba Taman Reservior ditu, kemari.
CIPKPS program ninting taun ke diatur ngena chara bepekit interaktif tauka ‘explorace’ ti mungkur kaban Kelab Penguna Sekula di serata menua.
CIPKPS Zon Utara diatur kena 19 Julai di Bintulu ke dipasuk 14 buah sekula, lalu kemari renggat Zon Selatan ti dipasuk 13 buah sekula , ti nyadika penyampau semua bisi 27 buah sekula ti mungkur 108 nembiak.
“Pemar ke ditapi kitai sekali tu, kitai milih 8 buah sekula ti pemadu nyulut lalu bepekit ba Renggat Nengeri kena 19 Ogos ke deka datai, udah nya kitai milih sebuah sekula ngarika Sarawak ba Renggat Nasional,” ku iya.
Ari 13 buah sekula ke bepekit renggat Zon Selatan kemari, bisi empat buah sekula ti teulihka penuduk pemadu manah iya nya SMK Kuching High, Kuching teulihka lumur satu sereta ditangkan SMK Datuk Patinggi Haji Abdul Gapor, Kuching (lumur 2); SMK Tun Abang Hj Openg, Kuching (lumur 3) enggau SMK Pesantren Abdul Taib Mahmud, Asajaya (lumur 4) ti deka bepekit ba Renggat Nengeri.
Ungkup Renggat Zon pemenang nerima perais iya nya lumur satu mai pulai mata duit RM200, trofi enggau setipikit, lumur dua ( RM160, trofi enggau setipikit) lalu lumur tiga mai pulai perais mata duit RM120, trofi sereta setipikit.
“Sehari tu program tu diatur enggau lanchar sereta meri pengaga ati ngagai semua ke ngambi bagi,” ku iya.
Sekula bukai ke bisi ngambi bagi ba pekit Zon Selatan baka SMK Semerah Padi, Kuching; SMKA Sheikh Haji Othman Abdul Wahab, Kuching; SMK Petrajaya, Kuching; SMK Green Road, Kuching; SMK Batu Kawa, Kuching; SMK Bandar Kuching No. 1, Kuching; SMK St Luke, Sri Aman; SMK Datuk Patinggi Kedit, Betong enggau SMK St Thomas, Kuching.
Sama bisi datai Sapit Pegawai Pelajar Pelilih Menua Kuching, Cheng Fei Ming.