Ketegal nya sida minta penerang ari Chong sentang pekara nya
KUCHING: Parti Sa’ati Rakyat Sarawak (SUPP), berasai tekenyit lebuh Perintah Besai Pakatan Harapan (PH) madah dalam Parlimen enda ulih mayar 20 peratus royalti minyak ngagai Sarawak.
Ku SUPP, ketegal nya sida minta penerang ari Chairman PH Sarawak, Chong Chieng Jen sentang pekara nya.
“Bayar royalti 20 peratus ngagai Sarawak sebagi ari semaya ke digaga PH sebedau PRU14,ti madahka lebuh PH megai Perintah Besai, sida deka mayar 20 peratus royalti minyak ngagai Sarawak,” ku SUPP nengah penerang berita kemari.
“Menteri Pekara Ekonomi Datuk Seri Mohamed Azmin Ali mega madah dalam Parlimen ke alai Perintah Besai enda ulih ngamatka semaya nya.”
SUPP ngutuk Perintah Besai PH ketegal ke enda ulih ngamatka semaya nya.
“PH udah nipu rayat Sarawak.Chong meseti madahka penegap runding diri sentang pekara tu ,sekalika iya setuju tauka enda enggau pemutus Perintah Besai PH.”
SUPP minta Chong nerang ngagai rayat Sarawak sentang semaya pengawa bepilih iya,nyengkaum 20 peratus bayar royalti minyak ngagai Sarawak sereta ngaku UEC,pengudah PH menang ba PRU14.
“Minyak nya siti ari asil pemansut Sarawak. Royalti minyak nya beguna amat ke Sarawak. Kitai enda patut ngemendar sebarang kebuah Perintah Besai PH enda mayar royalti minyak nya”.
“Chong patut badu nyeliahka diri ari isu ti ngeruga pengelantang pendiau rayat. Iya mega patut ngetu nyaga pengingin Malaya ngelui ari pengingin rayat Sarawak”, ku SUPP.
Bayar royalti 20 peratus ngagai Sarawak sebagi ari semaya ke digaga PH sebedau PRU14,ti madah lebuh PH megai Perintah Besai, sida deka mayar 20 peratus royalti minyak ngagai Sarawak. Parti Sa’ati Rakyat Sarawak (SUPP)
BAU: Penatai niang Pengajar Catherine Janet Tiwi, 25, urung pukul 7 lemai disambut enggau penuh penyinu sida sebilik, kaban belayan sereta peranak Genturung Pendiau Skio ditu, kemari.
Niang dibai ari Miri ngena penerebai kargo MH2803 pukul 4.40 lemai, ti sem- pulang apai iya Tiwi Nios, 53, ti mega Pemesai Kanan Bomba ba Balai Bomba Bau enggau indai iya, Wency Seimon, 48.
Kelimpah ari niang sebilik sereta kaban belayan ke semak, bisi urung beratus iku peranak genturung pendiau nya ti datai ngesah penusah nya dalam pukul 5 lemai kemari.
Niang dibai sereta disempulang ngena kereban pengangkut Opis Bomba enggau Penyelamat Malaysia (JBPM) Sarawak.
Dipelabaka pengawa nguburka niang diatur Hari Enam tu, ba Pendam Kampung Skio.