Ulah niang Catherine bisi nyelai sebedau midang
BAU: Ulah ti mai betabi jari sereta meri selamat jalai keterubah iya ari Pengajar Catherine Janet Tiwi, 25, enda disadang nyadi ti ke penudi ari iya.
Aya niang Catherine, Peter Nios lebuh dikerandau Utusan Borneo ba rumah niang di Kampung Skio kemari, madahka ulah niang nya pulai kemisi apin lama endang bisi berubah mimit.
“Nitih ku tusui menyadi tuai iya bisi siti ulah niang ke amat berubah. Ngelama tu maya menyadi tuai iya nganjung ke padang bilun sebedau tu, niang endang enda kala mai betabi jari sereta madah bye-bye.
“Tang sehari nya ( Hari Satu) iya ( Catherine) mai betabi sereta madah ‘byebye’ ngagai menyadi tuai iya. Nambahka nya, maya kemisi tu tadi iya melanja sida sebilik makai, mai makai pizza hut agi.
“Pemidang iya chukup diasaika kami semua. Ulah iya ti chukup mentas, deka mantu orang sereta manah enggau semua orang ngujungka iya chukup dikesayauka nyengkaum piak sekula sereta peranak genturung pendiau kelimpah ari kami sebilik,” ku iya.
Maya besekula, niang siku orang ti chukup regas ba lumba enggau main sereta nyadi kaban Kadet Bomba. Iya mega regas sereta taluk ba pengarap.
Niang ti asal ari Kampung Skio ngajar ba SK Penghulu Baya Mallang, Long Terawan, Mulu, lalu iya anak kedua ari empat iku diri menyadi sereta dalam diri menyadi nya semina iya siku aja indu.
Maya penusah nya nyadi, iya nyadi pengajar pengiring program kem motivasi nembiak ke diatur ba SK Batu Bunyan kenyau 24 Julai tu tadi, lalu enti nitihka tembu kena 28 Julai (pagila).
Ba penusah angus nya nyadi urung pukul 5 pagi ensanus, Catherine nguji deka nulung ngemansutka dua iku agi pengajar ke bisi dalam sebuah bilik kuarters SK Batu Bungan, tang iya enda sempat nyelamatka diri.
Kelimpah ari nitih ku aki niang, Seimon Jogei,madahka maya uchu iya pulai apin lama mega bisi ngayanka penyelai maya sida begempuru makai ngintu hari pengada menyadi iya.
Ku iya, selalu iya uchu iya suah betundi begagai enggau bala tang malam nya udah tembu makai iya duduk kediri ba meja makai baka ke bisi utai bukai dike- runding.
Maya dikerandau, Seimoi enda nyangka nya ke penundi endar betemu enggau niang lalu penyelai ulah niang kelai ninggal semua orang.
“Tang aku pechaya, Tuhan udah ngangauka iya. Aku enda ulih ngenang iya, meda gambar niang pan aku enda ulih, aku kelalu sinu,” ku Seimon madahka niang siku orang ti bebasaka orang, mentas, deka nulung orang sereta dikerinduka semua orang.
Berebak enggau tu bakih niang Catherine, Sabrina Metree lebuh dikerandau madahka pemidang niang endang pengelenyau besai ba iya ke bebakih enggau niang kenyau ari sekula sekondari.
Niang siku orang ke chukup manah ati enggau semua orang sereta siku orang ke chukup regas maya besekula lebih agi dalam Persatuan Kadet Bomba, ku iya.
“Niang siku orang ke chukup pengaga, siku orang ti chukup manah ati, aku temegah ati bisi bakih baka niang. Pemati niang chukup ngenyinu sereta diasaika aku.
“Aku enda nyangka ujung minggu tu tadi maya iya bisi pulai, kami ke betemu sereta begempuru ba Bung Jagoi kena 20 Julai, iya nya nyadi ti ke penudi endar.
“Kami duai lama enda betemu lalu maya betemu ba Bung Jagoi, iya mega chukup gaga ati lalu nadai ngayanka penyelai. Aku enda nyangka nya ke penudi endar betemu enggau iya,” ku Sabrina ti ngenang seraya labuh ai mata ngingatka kenang enggau niang Catherine.
Sabrina sehari kemari begulai enggau niang sebilik, kaban belayan sereta peranak Kampung Skio nganti penatai niang di bai ari Miri.