Besaup nyaga pengelikun, pengelantang ke pemaik Sarawak
SIBU: Rayat Sarawak dilalau nyaga pengelikun enggau pengelantang sereta bekerejasama ke pemaik nengeri tu.
Menteri Perengkaguna Mensia Mayuh Dato Sri Dr Stephen Rundi Utom madah, nya enda ngira bagi usul pupu bansa.
“Kitai patut naka ulih nyaga utai ke engkitai,” ku iya lebuh nutup Festival Main Asal Dayak Borneo (BDCF) beserimbai enggau Festival Main Asal Borneo (BCF) 2018 ba Sibu Town Square ditu kena Hari Tiga tu tadi.
BCF pengerami main asal ke pemadu besai ba bagi menua tengah ke udah diatur kenyau ari taun 2001.
Festival nya mantaika bemacham main pupu bansa The Dayak, Melayu/Melanau enggau China.
Rundi, ke mega Kaban Kunsil Kemena dulu ari nya muji Majlis Bandar Sibu ke udah ngatur festival, seraya madahka pengerami nya patut disukung semua.
“Ukai semina Dayak tang semua bansa di nengeri tu ngambika sida ulih mandangka daya pengidup ti dikemeranka sida nengah tanda, lagu enggau ke bukai,” ku iya.
Berebak enggau nya, Ambassador ke mega Ketuai Raban ari European Union ( EU) ke Malaysia Maria Castillo Fernandez, madahka iya berasai gaga amat meda pengaya main enggau pesaka asal peranak menua tu.
Fernandez keterubah endar datai ke Sibu l aban nyeeta Konferen Antarabansa Sawit 2018.
“Manah amat laban keteru- bah endar aku datai kitu ulih meda mayuh orang ba pengerami besai ke baka tu.
“Aku udah ke Miri enggau Kuching. Tu mih keterubah aku ke Sibu lalu berasai gaga amat lebuh ke ditu,” ku iya lebuh dikerandau ba palan festival nya kena Hari Tiga tu tadi.
Sama bisi datai Chairman Majlis Bandar Sibu (SMC) Datuk Tiong Thai King, sapit iya Rogayah Jamain, Temenggong Stanley Geramong, ADUN Machan Allan Siden Gramong, Sekretari Mendam Opis Menteri Perengkaguna Mensia Mayuh Dato Alice Jawan, chairman pengatur BDCF Paulus Dandee Banyang enggau Sekretari Politik Kepala Menteri Romeo Christopher Tegong.