Bantaika formula ke dikena ngira royalti minyak 5% ke dikena diatu, ku Wong

KUCHING: Perintah Besai baruh pegai Pakatan Harapan (PH) enda tau enda mantaika formula ke dikena sida iya ngira royalti minyak urung 5 peratus ke dikena diatu sereta penyampau ari 20 peratus ke disadang ari untung beresi.

Kaban Kunsil Nengeri (ADUN) Padungan Wong King Wei madah, tu kena ngemuntangka agi banding penyampau ke diberi ngagai Sarawak.

“Kitai anang enda ingat, ke ngasuh kitai arap nyadi siti ari pemerat dalam barang Perintah, lalu enti nadai nya, kitai enda ulih lama megai kuasa.

“Saut ari Menteri Pekara bekait enggau Ekonomi Datuk Seri Mohamad Azmin Ali di Parlimen (hari Tiga tu tadi) semina nyebut pasal empas ari pemeri royalti minyak urung 20 peratus, ke enda nyengkaum mulaika kuasa dalam pekara bekait enggau pelajar sereta pengerai, ke deka ngurangka belanja besai ba Perintah Besai,” ku iya madah nengah siti penerang ditu, kemari.

Enti pengawa nya digaga bansa nya, ku Wong, Azmin nyangka udah nemu asai iya ke deka ngempas tu ila, iya nya Perintah Besai nyangka deka napi penanggul ngetanka nya.

“Taja pia, penemu bansa nya salah. Perintah PH enda tau enda dilalau, iya nya rayat deka bemunyi enti kitai enda ngamatka semaya pengawa bepilih.

“Majoriti rayat nyangka nemu enti ngamatka sekeda janji pengawa bepilih nya lalu bedau ulih digaga diatu (tang ila)ketegal pengurang penuduk wang menua,” ku iya.

Iya nandu baru madahka, mayuh ari sida nyangka ulih diperundingka enti atur ‘sekunder’ diberi kelala laban enda ulih ngamatka sekeda janji pengawa bepilih.

Taja pia, ku iya, janji royalti minyak urung 20 peratus kelebih agi nerima pengarap ke besai endar ari rayat Sarawak.

Iya madah, enti nadai kebuah ke ulih diterima, ngamatka semaya bansa nya enda ulih bela diterima semua.

Ku iya, janji ba royalti minyak urung 20 persin enda digaga enti enda diperundingka nengah chara ke patut, lalu nambah enggau nya, PH udah bejurai sereta mantaika debat ke silik pasal pekara nya.

Wong madah, pekara tu siti pakej janji alai royalti minyak urung 20 peratus deka diberi ngagai Sarawak negulai enggau hak autonomi dalam pelajar sereta pengerai.

“Pemisi penambah royalti minyak nya sereta 50 peratus ari chukai ke digumpul di menua tu, Sarawak ulih mayar belanja pengerai sereta pelajar kediri empu, enggau laluh baka ke diperambuka.

“Dalam timpuh nya mega, kitai pan ulih ngelempungka penanggul belanja Perintah Besai, alai sebagi besai asil pemisi diberi ngagai Sarawak,” ku iya.