Pengaji ke ditemu ulih tang enda direjista maya operasyen nya ila, deka diberi kompaun tekala nya
KUCHING: Pertubuhan Keselamatan Sosial (PERKESO) Sarawak deka ngepunka operasi - OPS KESAN berengkah ari 1 Ogos tu ila, ngiga pengaji ke lalu bedau ngerijista pengawa ke digaga sereta pengereja pengawa sida.
Direktor PERKESO Sarawak, Philip Sangkan madah barang pengaji ke ditemu ulih tang enda direjista maya operasi nya ila, deka diberi kompaun tekala nya.
“Aku nesau semua pengaji ke ulih ngaji pengereja pengawa sereta ulih ngerijista pengawa sida tang lalu bedau ngaga pengawa nya, datai ngatika diri ngagai barang opis PERKESO ke semak enggau sida, ke bisi dibuka di serata menua, ngerijista pengawa sereta pengereja pengawa sida iya,” ku iya madah nengah siti penerang ditu, kemari.
Ku iya, pengaji ke enda ngerijista pengawa sereta pengereja pengawa sida iya enggau PERKESO nyadi siti penyalah ke tau diberi kompaun lalu didawa enggau penyampau kompaun entara RM500 ngagai RM4,000 nitihka timpuh penyalah ke digaga nya.
Lalu enti didawa di kort lalu ditemu salah, pengaji ke salah nya tau diukum denda enda lebih ari RM10,000 tauka kena jil enda lebih ari dua taun tauka kededua nya sekali.
“Kelimpah ari nya, pengaji mega deka diberi bungai urung enam peratus setaun ba tetiap bayar bulan ke laun dibayar berindik ari pengelaun ngerijista enggau PERKESO,” ku iya.
Bekait enggau statistik PERKESO di Sarawak dalam taun 2017, Philip madah pengaji aktif bisi dalam 36,865 lalu datai ngagai bulan Jun 2018, urung 53,741 pengaji aktif udah ngerijista sida iya empu enggau PERKESO.
Kelimpah ari nya, manggai ngagai Disember 2017, urung 291 kompaun sereta 143 dawa bisi dikeluarka sereta digaga ngagai pengaji ketegal penyalah ke digaga sida iya.
“Berindik ari pekara tu, aku nesau ngambika pengaji sereta pengereja pengawa bekerejasama enggau PERKESO beratika tikas atur nya dititih ulih semua pengaji sereta pengawa ke digaga sida iya nya besai baka ke diungkupka nengah Akta 4, Akta 789 enggau Akta 800,” ku iya.
Kena 6 Julai tu tadi, Ketuai Eksekutif PERKESO bisi madahka deka ngepunka ` Tempoh Pemutihan’ ke deka berengkah digaga kena 1 ngagai 31 Julai 2018.
Dalam timpuh tu, barang pengaji ke ngerijista sida iya empu ngatika diri enda disengkaum dalam atur kompuan sereta dawa taja pan laun ari timpuh 30 hari ke udah ditetapka.
Pengawa ngerijista ngatika diri dalam timpuh ke ditetapka nya mega, deka nyengkaum enda ibuh mayar bungai ke deka diberi nangkan tu ila.
Timpuh pengaji ke ngerijista sida iya empu enggau ngatika diri nya mega ulih dikena ba barang pengaji ke lalu bedau ngerijista pengawa ke digaga sereta pengereja pengawa sida iya nengah Akta 800, nyengkaum driba teksi ke gawa kediri empu sereta servis baka nya nengah Akta 789.
“Tempoh Pemutihan’ enggau ‘Ops Kesan’ digaga tetiap taun, laban meri peluang ngagai pengaji ke lalu bedau ngerijista sereta mayar ngatika diri datai ba barang 10 opis PERKESO di Sarawak. KUCHING: Parti Pekerja Sarawak ( SWP) nyadang ngambika Perintah Nengeri numbuhka sebuah opis menteri baru ke nyaga pengelantang pendiau rumah panjai sereta semua sida ke diau di rumah panjai.
SWP nengah siti penerang ditu kemari madahka opis menteri nya patut digaga kena bejalaika pansik sereta perambu kena beratika rumah panjai di menua tu ulih besemekih sereta nyapai pemujur.
Ku SWP, penumbuh opis menteri nya mai penguntung laban Sarawak ngembuan urung 4,500 rumah panjai di serata menua.
Ku SWP, enti nadai perambu digaga ari diatu, 10 taun tu ila, nadai mensia ke deka nguan rumah panjai.
“Sida ke diau di rumah panjai tu penyukung tegap Barisan Nasional (BN).
“Diatu udah perintah dipegai Gabungan Parti Sarawak (GPS), tu pengawa sida iya beratika pemisi kitai (rumah panjai) enda punas bansa nya aja,” ku SWP.
Bepelasarka pekara nya, SWP ngelalau semua wakil rayat Dayak berundingka chara ke pengabis manah sereta beratika reta pesaka komuniti tu deka dijaga.
“Kitai beratika mayuh ADUN Dayak datai ari rumah panjai lalu tu meh maya iya sida iya ngangkatka pemerat tu ke komuniti sida. Ukai semina meri geran projek mit menua pesisir (MRP) aja,” ku SWP.
Direktor PERKESO Sarawak