PNRB setuju enggau Sng minta KIU ngungkupka RM30j dikena nyemelaka rega lada
SIBU: Pemansang Nembiak Rebak Baru (PNRB) Pakan Julau besetujuka penemu Kaban Parlimen (MP) Julau, Larry Sng ti minta Opis Menteri Industri Besai (KIU) nyaup orang betanam lada ke benung betapi enggau rega lada ti murah.
Taja pan baka nya Presiden PNRB Pakan Julau Tedung Chakaw@ Jamal Abdullah madah, penemu nya ulih disungkakka agi nengah beberapa bengkah pengawa ti patut ditumbuhka.
“Penemu Larry manah tang kitai ngarap perintah berundingka semua ke nanam lada baik nya di menua di Pakan enggau Julau patut digagaka program bukai ti ulih nyaup orang betanam lada napi rega lada ke diatu jauh udah nurun baka ngaga aktiviti hiliran (downstream activities) tauka numbuhka siti industri palan nginjin lada ti ulih terus eksport produk lada ngagai menua bukai.
“Ba palan tu lada deka ulih terus dibungkus tauka digaga ngasilka produk bukai.
“Ari nya, kitai ulih nyaup orang betanam lada nentuka asil sida enda kelalu murah dijual laban udah nyadi produk,” pia ku iya maya berandau enggau pengarang berita, kemari.
Empai lama, Larry ba jaku iya di Aum Parlimen minta Opis Menteri Industri Besai ngungkupka RM30 juta dikena nyebelaka rega lada ngambika enda jauh nurun.
Iya madah, RM30 juta nya tau diberi ngagai Opis Lada Malaysia (MPB) ngambika sida ulih meli lada ngena subsidi nya nyema rega nurun ari baruh RM12,000 setan.
Nambahka jaku iya, Tedung madah, kelimpah numbuhka industri nginjin lada, palan alai mansik enggau pemansang pengawa nanam lada bela patut ditumbuhka di Julau/Pakan.
“Ba ditu tau endur orang belatih tauka belajar nanam lada,” ku iya.
Iya madah, nyentuk ke diatu, rayat ba pelilih nya endang agi mayuh betanam lada tang kelimpah ari napi rega murah sida mega enda ulih nyeliahka diri ari penusah bukai baka lada sakit.
Nengah palan nya ila ku iya, orang betanam ulih nambah penemu betanam lada ke beguna dikena nambahka tikas asil pemanah lada sida.
“Tang perintah mega meseti nemu laban enti kelalu ditating enggau penusah baka tu dia orang betanam lada tau nadai ati agi deka nanam lada.
“Kitai nemu eksport lada ari Sarawak besai amat reti ngagai penatai pemisi menua.
“Dikena ngenan mensia mayuh ke betanam lada tu enda ngetu nanam lada ketegal ke nurun rega dia minta perintah tau berunding terus meri sida ke betanam lada subsidi RM600 ninting bulan.
“Subsidi baka tu kala diberi ngagai orang berikan sebedau tu,” ku iya madah baru.
Kelimpah ari nya iya ngarapka perintah enda ngaga chukai ba sum enggau rachun ke dikena orang bekebun lada bepun ari diatu rega sum enggau rachun bangat mar sereta nanting penatai pemisi sida.
Ari semua nya, Tedung mega madah, perintah enda tau enda berundingka pemansang infrastruktur di menua pesisir lebih agi baka jalai alun.
“Baka sida ari Mujok enggau ai Kanowit, sida tu chakah amat betanam ke lada tang empai bisi jalai dikena sida bejual lada kelimpah ari ungkus ke besai laban ngena perau nyengkaum berangkut ke sum sida.
“Berindik ari nya, perintah meseti berunding enggau silik sentang pengawa nyambung jalai ngelawa rumah panjai baka di ai Kanowit tauka Mujok enggau lengkas” pia ku iya.
Kenyau ari taun 2016 nyentuk bulan Julai taun tu, rega lada putih nurun urung 65 peratus lalu rega lada chelum nurun urung 63 peratus.
Rega lada chelum diatu urung RM9,900 setan.
Orang betanam lada nadai chara bukai kelimpah nyual lada sida taja pan rega jauh murah ari suba, pia ku Larry.