Mayuh palan Bomba di menua pesisir napi pengurang perengkaguna ngerara api
BETONG: Palan Bomba di Betong nyangka napi pengurang perengka guna sereta pengereja pengawa mungkur pemesai sitak Betong nyema bisi penusah rumah angus ke nyadi.
Ketuai Parti Keadilan Rakyat (PKR) Betong Vernon Kedit lebuh ngelawa bagi pasar Betong ke angus kena empa api bedau lama tu tadi enggau Sapit iya, Noel Bucking madahka ba aum sida iya enggau opis Bomba di Betong, ti betuaika Pegawai Operasi Bomba Betong, Henry Jugah, iya madahka palan Bomba di Betong sigi napi pengurang perengka guna sereta pengereja pengawa di palan nya.
“Penangggul bansa tu ke dipadah ulih palan Bomba di Betong deka dibai ngagai aum Opis Menteri Kandang Menua enggau Pengawa Berumah renggat Perintah Besai. PKR Betong nguji mai pekara tu ngagai opis menteri, mantu pengurang ke ditapi ulih palan Bomba Betong.
“Taja pia, kami mega ngarapka Perintah Menua Sarawak nengah Gabungan Parti Sarawak ( GPS) bela mantu bagi sida iya, sereta betatika pemerat perengka guna agensi pengelikun di menua tu chukup, lalu ukai semina ngarapka opis penguasa di renggat Perintah Besai aja.
“Enti nitih, Sapit Kepala Menteri Datuk Amar Douglas Uggah ti mega mangku pengawa nyadi chairman Komiti Mutarka Penusah Ngenyit Nengeri Sarawak patut bisi perambu tauka program proaktif ke silik ba sebarang penusah ke bisi nyadi di menua tu,” ku iya madah nengah siti penerang bedau lama tu tadi.
Maya ngabas penusah ke nyadi bedau lama tu tadi, alai seblok pasar lama Betong ke bisi angus nya, Vernon madahka maya abas nya, sida ke bejual ba rumah kedai di pasar nya madahka pengangat ari rumah kedai ke kena empa api nya, ulih diasai 50 meter ari endur nya.
Sida ke bekedai dia mega muji pengelengkas Sukarelawan Bomba ari SK Chung Hua ke beguai mantu ngerara api nya, lalu baka nya mega enggau Bomba ari Betong enggau Saratok.
Ku Jugah, seraban pegawai Opis Bomba enggau Penyah Penusah (Bomba dan Penyelamat) enggau polis di Kuching deka bejalaika tasat rumah kedai di Betong ke angus nya laban ari ripot ke digaga madahka rumah kedai nya endang angus 100 peratus.
Ba penusah nya mega, Noel ti mega kala gawa enggau Opis Perambu Menua madahka penanggul ke ditapi ulih palan Bomba di Betong nyangka bela ditapi ulih palan Bomba bukai di sitak menua pesisir, lalu minta Perintah GPD betatika pemerat nya.