Jepak Holding Sdn Bhd enda lantang ati enggau jaku Manyin ke enggai mendingka sida
KUCHING: Jepak Holding Sdn Bhd enda lantang ati enggau jaku Menteri Pelajar, Sains enggau Pansik Teknologi Dato Sri Michael Manyin Jawong bekait enggau sadang mansik kuntrik ke bisi ba sida iya, ari ngasuh kuntriktor badu ngaga pengawa sida berindik ari penanggul diesel ke enda chukup dibekal ngagai sekula di menua tu.
Direktor Besai kompeni nya, Abang Saidi Abang Shamsudin nengah siti penerang ditu kemari madahka, enti nitih, iya ( Manyin) patut betemu enggau piak Jepak, beratika gaya penuduk sida iya dulu lalu ukai ngasuh runding mensia mayuh teperasa nengah meri penerang bansa nya, ke baka ke enggai nyidi penanggul nya enggau silik agi.
“Kami enda lantang ati enggau penerang nya laban enti nitih, iya patut betemu enggau kami dulu, beratika gaya kami lalu ukai ngasuh runding mensia mayuh teperasa meri penerang munyi nya.
“Ke penemu kita, kami ari pun nguji betemu enggau Manyin laban deka nerang ngagai iya, tang enda dikibuhka laban kenu, tu kes ‘ berprofil tinggi’ (besai). Tang pengawa iya ngeluarka penerang bansa nya mandangka pekara nya nyau lain munyi ari ke asal, laban utai ku iya nya, nadai nyadi baka ke di dawa iya,” ku Abang Saidi madah nengah siti penerang ditu, kemari.
Iya nandu baru madahka sepiak sida iya begulai enggau 12 subkuntriktor ke mekal diesel bisi udah betemu enggau Menteri Muda Pelajar, Dr Annuar Rapaee bekait enggau pekara nya kena 27 Jun tu tadi.
“Lalu ke penemu kita mega, rega kami mekal diesel, iya nya 50 peratus murah agi ari kuntriktor ke dulu agi dalam timpuh 10 taun tu ke udah.
“Jepak Holding Sdn Bhd ngeletakka rega urung RM459 juta ngagai Perintah dalam kandang tiga taun nya ke nyengkaum semua pengawa, enti dibanding enggau kuntrik lama manggai urung RM780 juta ngagai RM800 juta dalam kandang tiga taun nya, enda nyengkaum pengawa nyaga sereta miki,” ku iya.
Iya mega madahka sida iya udah madah ngagai Dr Annuar, iya nya ke timpuh 16 bulan keterubah, taja pan napi sekeda penanggul mit, sepiak sida iya enda kala enda nganjung diesel.
“Kami mega bisi madah ngagai Dr Annuar, iya nya kami berengkah napi penanggul nganjung diesel ke sekula dalam kandang berapa hari dalam bulan Jun tu tadi tang kami udah ngenembuka pengawa kami berindik ari bayar ke lalu bedau dibayar ngagai kami, sereta penerang pengarang berita ke digaga ulih Opis Menteri Pelajar lalu ngujungka gaya nya, orang enda arapka subkuntriktor kami.
“Diesel nya dibeli ngena mata duit ke dibayar tekala nya. Nya alai, lebuh bayar ngagai kami laun dibayar nyauka lapan bulan, nya nyadi penanggul ba kami lalu ngachau pengawa kami mekal diesel, lojistik (kelebih agi di sitak menua pesisir) sereta pengawa nyaga sereta miki injin api di sekula,” ku iya.
Nya alai ku iya, sepiak sida iya ngarapka Opis Menteri Pelajar Sarawak berunding enggau silik sebedau nyadang ngagai Opis Menteri Pelajar renggat Perintah Besai ngetuka kuntrik sida iya.