Laban enda mayuh pekereja menua luar diatu ti deka bekereja dalam sektor tu kelimpah ari penyampau gaji sida ti mar
SIBU: Sarawak ti nyadi pemansut besai minyak sawit di menua tu dipinta nambahka agi pengawa ti bekenaka proses mekanisasyen dikena ngurangka bepanggai ba pekereja pengawa menua bukai dalam industri nya.
Nengeri tu ngembuan kandang menua betanamka sawit 1.56 juta hektar pemesai tauka 27 peratus ari 5.8 juta hektar penyampau semua pemesai kandang betanamka sawit di menua tu.
Ba taun 2017 asil rega eksport produk sawit nengeri tu iya nya RM12.2 bilion.
Sapit Kepala Menteri, Datuk Amar Douglas Uggah Embas madahka pengawa ngubah ngagai proses mekanisasyen ba pengawa ngintu kebun dandang besai kemaya hari tu endang beguna.
“Kebuah pia laban enda mayuh bala pekereja ti bisi ati bekereja dalam sektor kebun dandang besai kelimpah mar ngaji pekereja menua luar,” ku iya.
Iya mansutka jaku nya ba jaku ti dibacha Menteri Muda Pemansang Tanah Adat Datuk Roland Sagah Wee Inn lebuh bejadika pengawa muka ‘Minggu Minyak Sawit Antarabangsa Sarawak’ (SIP- OW 2018) ditu ensanus.
Atur pengawa antarabansa tu diatur enggau kerejasama antara Lembaga Pemban- gunan Pelaburan (MIDA), Malaysia Biomass Industries Confederation (MBIC), Universiti Nottingham Malaysia enggau NRG Exhibitions.
“Aku andal amat dalam timpuh panjai, pengawa bekenaka injin deka nyadi pemutar praktikal dikena ngurangka pengawa kelalu bepanggai ba orang gawa menua luar.
“Komitmen tinggi raban ngatur pengawa mega beguna amat dikena nentuka program mekanisasyen mansutka asil dalam sektor kebun dandang besai,” ku iya.
Nitih ku Uggah, kandang diatu, pengawa bepanggai ba pekereja dalam industri sawit di Malaysia kelebih agi ba sektor kebun dandang besai di Sarawak chukup tinggi.
Ku Uggah, dalam taun 2016, sektor kebun dandang besai udah bekenaka sepenyampau 115,000 pekereja ti bekereja enggau bemacham sektor.
Ku iya, ari penyampau nya, 80 peratus iya nya pekereja menua luar seraya ke bukai iya nya pekereja menua tu nyengkaum Sabah.
Ngelansa silik, isu bukai ti patut diputar dalam industri sawit iya nya tuduh enggau kimpin negatif ti dilanchar- ka raban Gerempung Ukai Dikuasa Perintah ( NGO) menua luar enggau menua pengimport kelebih agi Kesatuan Eropah ti bekenaka isu rampa menua.
Taja pia, iya andal amat enggau Skim Pensijilan Minya Kelapa Sawit Malaysia (MSPO) ti dipejalaika perintah dikena mutarka isu nya laban skim tu ngaul nurutka penetap standard antarabansa enggau peminta rampa menua.
Iya mega meransang raban pemain industri, saintis, kaban agronomi enggau injinir ngambi ngempung pengelandik sereta pemansut sida begulai ba pengawa mansik enggau pemansang (R&D).
Sama bisi datai Ketuai Pemesai Eksekutif Fireworks Trade Media, Kenny Yong enggau mandal presiden MBIC, Ivan Ho Bee.