STU ngarapka bisi fleksibiliti sentang ngelangkar topik PKJR
SIBU: Gempung Pengajar Sarawak ( STU) begunaka fleksibiliti ba pengawa ngelangkar topik ungkup modul Pelajar Pengelikun Jalai Alun (PKJR) baru ngambika dipejalai ba semua sekula primari datai ba taun 2019.
Mansutka pekara tu kemari, Presiden STU, Jisin Nyud madahka iya patut bepanggai ba pekara baka ni topik tu diseriris sereta bakani kait nya.
Chara alternatif, iya merambu modul tu mega ulih diajar maya aktiviti kokurikulum.
Jisin ngelansa pasal jaku simpul Sapit Kepala Menteri Tan Sri Datuk Amar Dr James Masing rambau Aum Kunsil Nengeri (DUN) apin lama ke udah, madahka PKJR deka dipasuk ke dalam subjek Jaku Melayu (BM) deka dipejalai ba semua sekula perimari datai ba taun 2019.
Masing, ke mega Menteri Pemansang Infrastruktur enggau Perengka Pengangkut, mega madahka modul ti nyengkaum grafik, kod jalai besai enggau lalau pengelikun deka diajar dalam dua kali seminggu ari pengajar pengelikun jalai ti dilatih ba 1,264 buah sekula primari serata Sarawak.
Nimbal pekara tu, ku Jisin, ngajar modul pengelama dua kali ti nyengkaum grafik, kod jalai besai enggau lalau pengelikun antara bukai ungkup dua kali seminggu ari bala pengajar pengelikun jalai ti dilatih ba 1,264 buah sekula primari di serata Sarawak patut enda ibuh ditetapka baka nya.
“Kebuah pia laban bala nembiak ari bemacham penau enggau peneleba deka beratika pekara tu bebida. Kelimpah ari nya, bala nembiak ari kandang menua ulu enggau menua pesisir nyangka mar deka meretika tauka ngaul kelai tu ba pengidup sida besehari sehari laban nadai perengka guna ke baka nya bisi ngelingi sida.
“Nya alai, meseti bisi fleksibiliti ba perambu topik tu bepanggai baka ni topik tu diseriris enggau relevan. Enti enda, modul tu ulih mega diajar maya aktiviti kokurikulum,” ku Jisin.
Ku iya, STU setuju enggau pengawa bejalaika PKJR baru ngambika dipasuk dalam subjek BM ba semua sekula primari datai ba taun 2019.
“Tu mega manah dikena nerenakka ulah deriba ti meruan antara bala nembiak ti bepun ari renggat umur biak.
“Ari pengawa tu, sida deka bisi penemu manah agi enggau meretika pekara pengelikun jalai alun. Nya alai, tu deka ngurangka penyampau penusah lebuhka deriba ba jalai ba sebarang gaya jalai,” ku Jisin merambu.
Gempung Pengajar Bumiputera Sarawak (KGBS), ba lansa bukai madahka sida endang mantah perambu nya.
Presiden KGBS Ahmad Malie nambah, sida mantah perambu nya laban sida beratika pekara nyangka nating bala pengajar lebuh iya dipejalai maya (ngajar enggau belajar) PDP ba modul tu.