Perintah dipinta ngelengkaska projek bekal ai beresi di menua pesisir

SIBU: Bisi 1,156 ruang bilik di sitak Balingian agi randaka perengkaguna pemun baka bekal ai beresi, pia ku Kaban Kunsil Nengeri ( ADUN) Balingian Abdul Yakub Arbi.

Ku iya, ari sepenyampau 1,156 ruang bilik tu, bisi 687 ruang bilik ari Balingian enggau Kuala Balingian, lalu 469 ruang bilik agi iya nya ari Bayan Ulu, Temesu enggau Pengkalan Lobang.

“Diatu, peranak di kandang menua tu semina ngarapka ai sungai, ai bukit sereta ai ujan ke dikena ngulihka bekal ai.

“Bekaul enggau pekara tu, aku ngarapka Menteri Pemansang Menua Pesisir ulih ngelengkaska agi pengawa ngaga projek bekal ai beresi ba kandang menua tu,” ku iya madah ngagai The Borneo Post lebuh dikerandau kemari.

Abdul Yakub madahka pekara tu lebuh ti ditanya bekaul penyampau ruang bilik dalam sitak dipegai iya ke agi begunaka bekal ai beresi.

Iya madah kala bejuraika pekara tu lebuh Aum Kunsil Nengeri (DUN) ti dipejalai bedau lama.

Beserimbai enggau nya, Menteri Bekal Ai enggau Elekterik Menua Pesisir Dato Sri Dr Stephen Rundi madah lebuh nyimpul jurai ari opis menteri iya maya aum DUN bedau lama nyebut projek Bekal Ai Alternatif Sarawak (SAWAS) endang bebendar mekuh deka nyapai visyen Sarawak ti inginka 100 peratus bekal ai di selampur nengeri tu datai ba taun 2025.

Ku Dr Rundi, Sawas ia nya sistem bekal ai ti pemadu strategik ke ulih meri ai beresi ngagai komuniti di kandang menua pesisir.

Ku iya madah nyemetak,ba pengawa ti keterubah, lima pakej udah dipejalai ke nyadi projek pemungkal dalam mayuh kandang menua di Sarawak lalu tetiap endur tu enda sama tikas pejalai projek nya.