Isu royalti ngasuh peranak Sarawak ensiban: Yusuf Sarawak enggai nyadi nengeri merinsa sereta tinggal pemansang nyentuk ke ila-ila
KUCHING: Penerang dibantai Menteri Besai Tun Dr Mahathir Mohammad bekaul meri royalti 20 peratus ari untung minyak enggau gis ungkup Sarawak ngujungka mayuh peranak Sarawak enda lantang ati sereta ensiban.
Kaban Parlimen Tanjong Manis Yusuf Abd Wahab ti madah munyi nya nandu, nya bisi bida enggau isi manifesto pengawa bepilih besai Pakatan Harapan ( PH) ti besemayaka 20 peratus bayar royalti ari pemansut asil.
“Berita tu nyau nyadi isu petalat mensia mayuh ba selampur nengeri lalu kitai ke nyadi pengari rayat ari Sarawak nerima mayuh kangau sereta pesan WhatsApp minta mantaika isu tu lalu madah penerang pasal (royalti) 20 peratus ari untung enda ulih diterima rayat Sarawak,” ku iya rambau sesi debat nimbal Jaku Yang di-Pertuan Agong di Dewan Rakyat, ensana.
Iya ngarap manifesto PH ulih dikeamat dalam timpuh 100 hari baka ke udah
Berita tu nyau nyadi isu petalat mensia mayuh ba selampur nengeri lalu kitai ke nyadi pengari rayat ari Sarawak nerima mayuh kangau sereta pesan WhatsApp minta mantaika isu tu lalu madah penerang pasal (royalti) 20 peratus ari untung enda ulih diterima rayat Sarawak. Yusuf Abd Wahab Kaban Parlimen Tanjong Manis
dipekat.
Sarawak ku iya, enggai nyadi nengeri merinsa sereta tinggal pemansang sampai ke ila-ila, lalu udah datai maya iya Sarawak nyingkang nuju pemansang ke lebih menyana disikap enggau infrastruktur di mengeri enggau menua pesisir.
Enti dibanding enggau nengeri- nengeri di Semenanjung Malaysia, Sarawak agi jauh tinggal lalu takah pemansang nya seruran bisi nyema Sarawak nadai nerima agih ti lebih mayuh dikena bejalaika mayuh projek.
“Nengah Undang-undang Perintah Besai, Artikel 112(C), Sarawak enggau Sabah bisi hak nerima pemeri khas sereta asil ari perintah besai.
“Tang kenyau berapa lama, pengawa meri khas enggau nyuaka asil baka ke udah dalam undang-undang, sigi udah lama nadai dipedulika perintah perintah besai.
“Tu mih reti hak- hak Sarawak ke udah lenyau,” ku iya.