Kerita enggau lori belantak, siku bebadi nyawa, dua bakal
TATAU: Siku lelaki bebadi nyawa pengudah kerita ke ditepan iya belantak enggau sebuah lori kargo 10 tan di Kilometer 1 Jalai Tatau-Bintulu ba mua Sekula Sekondari (SMK) Tatau, pagi kemari,
Ketuai Opis Pansik enggau Penerit Adat Trafik Sarawak Superintenden Alexson Naga Chabu madah, penusah nyadi urung pukul 10.30 pagi nya dipelabaka nyadi maya kerita ke ditepan Galambong Awan, 46, datai ari Bintulu nuju ke Tatau ensayar ngagai jalai sepiak ti ngelaban arus lalu belantak enggau lori ti datai ari Tatau ke Bintulu.
Ku iya, penusah bebadi nya ngujungka orang ti deriba kerita mati tekala nya ba palan penusah nyadi lalu orang ke deriba enggau pemantu deriba lori semina bakal.
Iya madah, deriba kerita nya dikenuku paramedik Klinik Pengerai Tatau mati ba palan penusah nyadi lalu tubuh iya udah dibai ngagai Rumah Orang Mati Sepital Bintulu.
“Pemantu deriba lori ke bakal udah dibai ngagai Klinik Pengerai Tatau sebedau dibai ngagai Sepital Bintulu,” ku iya nengah sebengkah penerang seraya madah, kes dipansik nitihka Seksyen 41( 1) Akta Pengangkutan Jalan (APJ) 1987.
Galambong gawa ba Opis Pelilih Tatau peranak Rumah Sawing, Batu 23, Jalai Bintulu-Miri, lalu orang ke deriba lori iya nya Hairil Amir, 33, enggau pemantu iya Lagak Asai, 25.
Ba penusah nya, Balai Bomba enggau Penyah Penusah (BBP) Tatau nerima ripot pasal penusah nya urung pukul 10.33 pagi lalu berumban ngagai palan penusah ngena sebuah LFRT ditepan 12 staf betuaika PBK II Bonnie Sera.
“Datai ba palan penusah, piak kami meda deriba kerita udah tekepit ba penuduk deriba lalu dikenukuka raban perubat ari klinik pengerai udah nadai,” ku PBK II Bonnie dalam ripot iya ditu, kemari.
Iya madah, piak bomba terus ngemansutka lelaki nya ngena perengka ke dibai lalu mai iya ngagai polis ngambika diputar.
“Udah nya deriba enggau pemantu deriba lori udah pansut ari lori nengah saup mensia mayuh.
“Nitih penerang deriba lori bisi bakal ba kaki sereta punggung, udah nya pemantu deriba lori ke bela bakal udah diperubat lalu dianjung ngagai sepital ngena ambulans,” ku iya.
Ku iya, operasyen mantu sida ke bebadu nya tembu pukul 11.30 pagi ke bela dibantu raban polis enggau raban ari Klinik Pengerai Tatau.