Siku orang tuai dipumpung, pala ditunu enggau mutosikal
SARATOK: Ukai semina mumpung pala, siku lelaki dipelaba timpang runding kempang nunu pala siku orang tuai begulai enggau sebuah motosikal ke dipenggi anak indai tuai orang nya ba penusah ke nyadi lemai ensana.
Insiden tu nyadi ba Rumah Panjai Lumpoh Bratong Baru di Roban, urung pukul 2.30 lemai.
Orang ke bebadi tu Gelingi Ngaing, 75, maya penusah nyadi benung berandau ba bilik besai begulai enggau siku agi sida sebilik, enda mukai-mukai saspek datai mai duku lalu mumpung pala orang tuai nya.
Ketuai Polis Pelilih Saratok DSP Mordani Tanin madah, bekau ari duku ke dibiau saspek, orang tuai nya terus mati tetingkap tekala nya, diumba darah ti mayuh pansut sereta putus pala.
“Saspek iya nya lelaki beumur 57 taun ditan polis dipelaba ngembuan rikod bekaul enggau penusah nya.
“Pansik tumu, saspek ngaku mumpung pala orang tuai nya lalu nunu iya enggau sebuah motosikal dipenggi siku lelaki ke mega anak indai tuai orang nya laban iya udah diasuh antu munuh orang tuai nya,” ku iya nengah penerang media, kemari.
Dipelaba mega saspek bisi ngembuan rikod kes lama munuh bini iya empu lalu kala dijil, tang dilepas urung taun ke udah.
Saspek ditangkap enda jauh ari palan penusah nyadi lalu piak polis bisi tetemuka dua iti duku enggau siti kapak dipelaba dike a saspek munuh orang tuai nya.
Tandu Mordani, raban polis bisi tetemuka kerimpak rangkah pala orang tuai nya lebih kurang tiga meter ari palan saspek ngelalaika senjata nya.
“Bekau ari nya, saspek diriman pengelama tujuh hari bepun sehari tu (kemari) lalu kes dipansuk nitihka Seksyen 302 Kanun Keseksaan.
“Udah nya, tubuh orang tuai ke bebadi nya udah dibai ngagai Sepital Sibu ngambika dipansik,” ku iya.