Simposium Main Asal Sarawak ketujuh berengkah Ogos
SIBU: Opis Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit deka ngatur Simposium Main Asal Sarawak Ketujuh nyerumba Pengerami Sarawak Merdeka 2018.
Menteri iya, Dato Sri Fatimah Abdullah madah, simposium lima tahun sekali nya diperambu bulan Ogos lalu patu tembu kena 11 November 2018 ba Kuching.
Pengerami nutup ke ditaga ba Hotel Imperial deka dipenyadika Kepala Menteri, Datuk Patinggi Abang Johari Tun Openg.
“Perintah nengeri seruran bebendar nentuka adat pupu bansa di nengeri tu seruran dijaga sereta dikerembai.
“Ungkup simposum serak tu, kitai meri agih belanja ungkup tujuh etnik besai ngatur simposium main asal iya nya Melayu, Melanau, China, Iban, Bidayuh, Orang Ulu enggau India.
“Rambai jaku simposium taun tu iya nya Managing Culture In Digital Era,” ku iya rambau nutup Panggau Main Asal Melayu Melanau nyerumba Pengerami Main Asal Borneo (BCF) 2018 ba Dataran Bandar Sibu, malam ensana.
Sama bisi datai Sekretari Politik Kepala Menteri Abu Seman Jahwie, Sapit Chairperson Kaunsil Mengeri Sibu (MPS) Rogayah Jamain, Ketuai Pengatur Panggau BCF Melayu/Melanau Zaiton Abdul Kader, Pengatur Begulai Panggau BCF Melayu Melanau Nazatusyima Bujang sereta bala bukai.
Kenu ku Fatimah, siti ari objektif simposium nya dikena nentuka adat asal di nengeri tu seruran dijaga.
“Kitai patut nemu nama reti main asal. Main asal ukai semina betanda, pekayan tang ngembuan reti ke besai,” ku iya. Kaban Kunsil Nengeri Dalat nya mega minta komiti main asal tauka gerempung Melayu Melanau ungkup simposium main asal deka datai, berati baru resolusyen ke udah digaga ba simposium keenam suba.
Tu beguna amat ku iya, ngambika enda nyadi betinggang resolusi sereta nentuka resolusi ke udah digaga sebedau tu nyapai juluk.
“Nyema kitai beratika resolusi Simposium Main Asal Sarawak Keenam ungkup bansa Melanau, entara ke ditekan ba resolusi iya nya nyaga jaku bansa asal.
“Ba resolusi main asal Melanau aku udah berati lalu meda sigi perambu iya nya numbuhka Kaunsil Sago/ Mulung.
“Kaunsil tu beguna amat dikena nentuka industri mulung ulih ngerembai mansang nyadi siti chara dikena ngemansangka ekonomi,” ku iya.