RM5 juta udah disua ngagai penerima nengah RTP DUN Repok
SARIKEI: Kaban Kunsil Nengeri Repok Dato Sri Huang Tiong Sii kena Hari Tiga tu tadi udah nyuaka Projek Pemansang Menua Pesisir (RTP) sepenyampau RM5 juta dikena ngaga mayuh bengkah projek.
Ari penyampau nya, RM235,000 udah dibagi entara semilan buah sekula ngambika bisi dikena ngangkatmanah blok kelas enggau perengka ke bukai; RM1,550,000 dikena ngangkatmanah Gerija St. Anthony, Gerija Methodist Pasar Sarikei, Gerija Methodist Nyelong Park enggau geraga ngelingi pendam Islam, RM200,000 dikena nyeruri dua b uah rumah panjai (Rumah Bajut enggau Rumah Ngelai) lalu RM900,000 dikena ngangkatmanah begunan enggau gelanggang Maksak, ngaga stadium Basketball sereta ngangkatmanah begunan Gerempung Bansa Dayak Sarawak (SDNU) pampang Sarikei.
Ku Huang, belanja RTP nya udah diungkupka perintah nengeri ngagai pengari rayat ungkup taun tu.
Iya madah munyi nya ba pengawa nyuaka nya ti diatur ba Palan Servis iya ditu kena ngalih hari Hari Tiga tu tadi.
Nemu agi mayuh pengawa deka dikereja dikena nyungkak standard pengidup rayat, iya deka majak ngulihka belanja ungkup pemansang ngambika ulih nyendia perengkaguna baka jalai, klinik, ai beresi, bekal elekterik, sekula enggau ke bukai, ku iya Huang.
Iya ngarapka rayat an- dalka pemeri mimit ari iya ke nyadi pengari rayat, ku Huang seraya madahka urung RM100,000 udah diberi iya ngagai Sepital Sarikei, ti mega chunto iya bebendar deka ngangkatka tik as pengidup rayat dia.
Antara projek besai dalam rintai ti deka dipejalaika enda lama agi, iya nya jalai ke nyambung Sarikei ngagai Tanjung Manis, mindahka palan penyangkai komersial ngagai palan baru di seberai Sungai Nyelong enggau muka tanah endur betanam betupi tauka Agro Park ditu, ku iya.
Iya mega ngarapka Kaban Parlimen Andrew Wong ulih mantu peranak menua dia minta belanja ke pemansang ari perintah besai.