Pengelekai penyakit denggi ulih diputar mensia mayuh nengah pengawa chakah ngintu pemeresi kandang pendiau, ku Oscar
SIBU: Mensia mayuh enda ulih kelalu bepanggai ba perintah ngemunaska penyakit denggi.
Kaban Parlimen (MP) Sibu Oscar Ling Chai Yew madah, kebuah pia laban pengelekai penyakit nya semina ulih diputar mensia mayuh empu ari pengawa chakah ngintu pemeresi kandang pendiau.
Kitai meseti nyaga pemeresi lebih agi nyeliahka tin, pasu bungai, tayar tauka uras bukai ti tau nakung ai ba kandang pendiau. Oscar Ling Chai Yew MP Sibu
Ku iya, tu bela bepanggai ba ulah semua piak ti deka ngurang tauka munaska penyakit nya.
“Kitai meseti nyaga pemeresi lebih agi nyeliahka tin, pasu bungai, tayar tauka uras bukai ti tau nakung ai ba kandang pendiau.
“Enti ditempia baka nya, ai ti nanak nya tau endur nyamuk betelu ngujungka penyakit denggi nyadi.
“Bepanggai ba kitai empu ngemunaska penyakit denggi,” pia ku iya maya bejadi Program Beripai Renggat Pelilih Sibu ba Palan Dagang Taman Rejang ditu, kemari.
Program tu diatur begulai Opis Pengerai Sibu ti bela digulu Pemesai Opis Pengerai Sibu Theng Chong Han enggau bala bukai.
Ba program nya, Ling bisi nyadung penerang sentang nyeliah pengelekai penyakit denggi ngagai mensia may- uh.
Iya mega minta orang ke diau dia magi maya lepa sida meresi kandang pendiau abis nadai sekali seminggu.
“Tentuka endur diri empu beresi ngambika kitai likun ari penyakit denggi kelimpah ngemeranka chara idup bepengerai.
“Enda ibuh kelalu lama, setengah jam udah chukup dikena kitai meresi kandang pendiau,” ku iya ngelalau.
Ling madah, penyakit denggi tusah deka dipunas sereta endang dirikodka bisi nyadi ninting taun ketegal ulah mensia mayuh empu.
Iya ngarapka penerang ke disadung nya tau nyadika malin ngagai mensia mayuh besaup munas pengelekai penyakit nya.
Kelimpa di Sibu, program nya mega sereta dipejalai ba serata menua ke diatur Opis Menteri Pengerai Malaysia nengah Opis Pengerai Pelilih Menua.