Sitak Dalat deka ransing ngemansangka industri produk ti bisi ngena mulung

MUKAH: Dalat endang keran ngemansangka industri ngaul mulung nengah chara baru.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madahka, selinting pengawa patut diberi ba pekara mansutka asil produk ti nangkan ke asil keterubah belalauka utai tanam pemakai asal etnik Melanau nya.

“Aktiviti hiliran patut diberi pemerat enggau chara baru seriris enggau ubah jeman dikena nentuka iya ulih meri asil manah agi,” ku iya lebuh bejadika Aum Besai Serakup Melanau Dalat Sarawak 2018 bepalan di Balai Komuniti Dalat kemari.

Tambah ba pengawa ngeluarka produk hiliran mulung mega deka nyungkak sosio- ekonomi peranak di menua.

Fatimah ke mega Kaban Kunsil Nengeri ( ADUN) Dalat madahka pelilih menua nya nyadi pengeluar mulung pemadu besai, manggai 40,000 ngagai 50,000 tan metrik setaun.

“Pemesai dandang utai tanam tu di Balat mungkur 29,419 hektar,” ku iya ma- dah baru.

Dalat mega bisi enam buah kilang mulung lalu tu kelai pemadu manah ngambika bisi peminta ngemansangka industri nya ari chara lama ngagai dagang besai.

Ba lansa bukai, iya mega minta tetiap etnik Melanau nerenak, ngintu enggau ngelaku sereta mendokumentasikan pesaka main asal sereta adat entik nya.

Kebuah pia dikena nyeliahka iya punas lalu nadai agi dikelala rebak dudi hari.

Raban etnik tu ti udah mindah ngagai mengeri besai dilalau enda ngelengkaka jaku enggau main asal sida.