BDA chakah nentuka menua Bintulu nyadi mengeri beresi
BINTULU: Program AntiUras Bintulu Development Authority (BDA) udah mujur dipenyadika Kepala Menteri Datuk Patinggi Abang Johari Tun Openg di Kampung Jepak urung pukul 9 pagi kemari.
Tu batang pengawa ari program pengudah renggat program anti- uras diatur BDA ti deka ditampung dataika ujung taun enggau ba taun ti deka datai.
“Aku deka meri tabi puji ngagai BDA ba pengawa tu ti nempa Bintulu nyadi mengeri chukup beresi,” ku Abang Johari pengudah bejadika kelai ngelacharka pengawa nya sebedau bekejang ngagai Padang Bilun Bintulu laban iya bisi ngulu atur pengawa bukai di Matu.
Program anti-uras keterubah iya udah dipungkal kena 8 Januari 2018 di Bintulu ti udah matak penyereta ari beratus iku rayat.
Batang tuju program tu iya nya meri kesedaran ba pengawa ngintu pemeresi enggau pekara pengerai di pasar Bintulu kelimpah ari nerenakka ulah anti-uras ngagai peranak di menua nya.
Pengawa nyaga pemeresi pasar ukai semina telempai di baruh BDA aja tang nentuka iya nyapai pemujur, begunaka tim kereja antara BDA, ejensi perintah, opis, nembiak sekula, komuniti dagang, parti politik sereta mensia mayuh.
Sama bisi datai bini Abang Johari, Datin Patinggi Dato Juma’ani Tuanku Bujang, Kaban Kunsil Nengeri (ADUN) Jepak Datuk Talib Zulpilip, Residen Bintulu Jack Aman Luat, Menijar Besai BDA Rodziah Morshidi, Penghulu Drahman Kawi, bala staf BDA sereta bala komuniti di menua nya.