Belajar ari penusah ke nyadi, sekula buruk patut dikemanah
SIBU: Pemidang ti balat ngenyinuka ati siku pengajar biak, Catherine Janet Tiwi, ba penusah angus di Sekula Primari (SK) Batu Bungan, Mulu kena Hari Tiga tu tadi, patut muka runding perintah nengeri enggau perintah besai ngambi bekerejasama nyedia sereta ngangkatmanahka penyikap perengka guna pemun di semua sekula menua pesisir.
Seriris enggau pekara nya, Kaban Kunsil Nengeri (ADUN) Bukit Assek, Irene Chang ngansak Opis Menteri Pelajar nengeri numbuhka Komiti Pengerai enggau Pengelikun ngambi bejalaika pangku pengawa nyadi raban penyanding penemu ngagai Opis Menteri Pelajar Perintah Besai.
“Komiti tu patut datai ari sida ti megai pengawa berat menua tu ngambi bekerejasama enggau opis menteri nengeri enggau perintah besai sereta diberi kuasa ngaul diri ba pengku pengawa meresa ninting taun ngagai sekula nya,” ku iya rambau aum pengarang berita di Indu Opis DAP Sibu ditu, kemari.
Ku iya, rambau Aum Kunsil Nengeri (DUN) ti baru udah tembu, Menteri Pelajar, Sains enggau Pansik Teknologi, Datuk Seri Michael Manyin Jawong madah ke alai bisi 428 buah sekula menua pesisir di Sarawak ti apin ngembuan bekal ai beresi, seraya 371 buah agi bepanggai ba ijin api ngulihka bekal kuasa karan.
Iya mega madah sepenyampau 1,020 sekula ti udah repok lalu nyadi pun penusah baka ti nyadi ba buding SK Punan Ba di Belaga ti runtuh dalam taun 2011.
“Ketegal Menteri Pelajar baru chakah ngatur pengawa ngempung penemu pasal pengawa ngemaru enggau polisi bekaul sekula, aku ngansak Opis Menteri di baruh pegai perintah baru, Pakatan Harapan (PH) ngambika meri pemerat ba pekara ti betul, kelebih agi ngaul nasit sekula di menua pesisir enggau menua ulu Sarawak.
“Sekula tu begunaka perati enggau jampat agi ngambi diberi penyikap perengka guna pemun baka bekal ai beresi, bekal kuasa karan 24 jam sereta struktur sekula nitihka pematut ti disikap ngena perengka guna, ukai nya ubah ari sukut polisi,” ku iya.
Taja pun ke amat penusah angus SK Batu Bungan ti nabanka nyawa pengajar beumur 25 taun enggau dua iku pengajar bukai bakal apin ditemu, tang ku Chang, Opis Menteri Pelajar patut sedar ke alai tebal agi sekula menua pesisir chukup ngasuh sinu, tau meri pangka enda manah ari sukut pengerai ngagai bala pengajar enggau nembiak.
Ngelansa pasak penerang Kepala Menteri, Datuk Patinggi Abang Johari Tun Openg ba sebengkah surat berita menua tu apin lama ke udah, ke alai iya enda mereti nama kebuah Opis Menteri Pelajar Perintah Besau enda bejalaika pengawa proaktif nyambung sekeda sekula enggau grid kuasa ke bisi, tang rindu agi bekenaka injin api, ku Chang, penerang nya ngasuh saru penemu lalu enda patut.
Ku iya, Abang Johari patut agi sedarka penanggul sekula repok enggau nadai ngembuan penyikap perengka guna pemun ti bepun ari pengelemi atur pengawa perintah besai enggau nengeri Barisan Nasional sebedau tu. — Bernama