Kes angus: Perintah nengeri nyuaka pemeri RM10,000 ngagai Nur Syuhada
KUCHING: Perintah nengeri bisi nyuaka pemeri penyampau RM10,000 ngagai Nur Syuhada Azhari sebilik, siku ari dua pengajar ti bakal ba penusah angus kena Hari Tiga tu tadi di SK Batu Bungan, Mulu.
Pemeri nya disuaka Menteri Pelajar, Sains enggau Pansik Teknologi Dato Sri Michael Manyin Jawong ngagai indai Syuhada, Hamidah Zakaria ditu, kemari.
Bela bisi ngemataka pengawa nyuaka pemeri nya iya nya laki Syuhada, Muhammad Rohaizad Abd Rahim, sida sebilik sereta mega pemangku Direktor Pelajar Nengeri, Abang Mat Ali Abang Masagus enggau bala pemesai ari Opis Pelajar Nengeri (JPNS).
Indai Syuhada enggau sida sebilik udah terebai ari Kelantan ngambika nyempulang iya, pengudah iya dipindah ari Sepital Miri ngagai Sepital Besai Sarawak kena Hari Lima tu tadi, nampung perubat ba Ward Betu.
Rohaizad, ti bekereja di Kuala Lumpur, terebai tumu pagi kena Hari Tiga ngagai Miri pengudah nerima berita. Iya mega bisi di Kuching ditu disempulang sida sebilik.
Manyin enggau bala pemesai JPNS mega ngelimpangka awak diri berandau enggau sida nya sebilik seraya meri jaku peransang.
Nitihka penerang, gaya pengerai Syuhada majak belinsur manah taja iya nyangka deka beputung ditimpuh kemari tauka sehari tu.
Penerang madahka Syuhada betu 20 peratus ari tubuh iya, kelebih agi ba jari. Iya mega agi napi pemar bejaku naka kemari.
Rohaizad, lebuhka dirandau pengudah pengawa nyuaka pemeri nya, madahka iya meri terima kasih ngagai perintah nengeri enggau peranak Sarawak ti udah ngayanka penyiru enggau besampika pengerai bini iya.
Iya enggau Syuhada, bela beumur 27, baru jadi kandang sebulan ke udah, rambau pengerami Hari Raya Aidilfitri.
“Sida sebilik udah terebai kitu ngambika sama begulai enggau iya sereta meri sukung enggau ngeringka semengat iya,” ku iya.
Seraya siku agi pengajar ti bakal, Siti Masrina Nian agi di Miri laban iya enda balat balat.
Iya mega dipelaba nerima pemeri RM10,000 ari perintah nengeri, ti udah ngagihka belanja dikena mantu sida ti tasah angus.
Wang turu nya udah dilancharka Kepala Menteri Datuk Patinggi Abang Johari Tun Openg kena Hari Tiga tu tadi enggau pemeri berengkah ari RM50,000 ari perintah nengeri.
“Wang turu tu deka diberi nengah Tabung Perayaan Hari Guru Negeri Sarawak ti deka diatur Direktor JPNS.
Mensia mayuh diperansang nyuaka pemeri sida, lalu pemeri patut dipasuk ngagai Bank Rakyat, lumur akaun 11127100764.
Penusah angus ti nuntung SK Batu Bungan, nabanka nyawa niang Catherine Janet Tiwi, ngansak ngambika perintah besai nyeleti enggau ngemanahka sekula repuk di kandang menua pesisir enggau menua ulu Sarawak.
Sepenyampau RM30,000 ari wang turu nya udah diberi ngagai sida niang Catherine sebilik, ke alai niang ti udah ditumbak ba menua asal niang empu di Kampung Skio, Bau kena Hari Enam tu tadi.