Supervisor, pengajar sereta pengintu nembiak di taska enggau tadika dipinta meresa pengerai nembiak enggau silik
KUCHING: Supervisor, pengajar sereta pengintu nembiak di taska enggau tadika di Sarawak dipinta silik agi maya meresa pengerai nembiak ke diibun sida.
Menteri Pengintu Pengelantang, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah pekara nya berat ngambika sebarang penyakit tau ditemu enggau lengkas.
“Tu nyengkaum meresa tapak jari, mulut enggau ikas pengangat tubuh nembiak sebedau sida tama ke kelas.
“Supervisor, pengajar sereta pengintu nembiak mega meseti nentuka nembiak ke diibun sida masu jari enggau beresi sebedau enggau pengudah makai, lalu pia mega pengudah tama agu,”ku iya.
Fatimah mansutka jaku nya nimbal surat penerang berita ari Ketuai Direktor Opis Pengerai (KPK) kena 28 Julai ti madah Sakit Jari, Kaki enggau Mulut(HFMD) udah nabanka nyawa seiku nembiak beumur 2 taun 5 bulan di Pangtray Daro, Mukah.
Dikena nentuka HFMD enda ngelekai balat agi, Fatimah dekaka penyelia, pengajar sereta pengintu nembiak nentuka kandang endur ngelingi taska sereta tadika seruran beresi.
Kelimpah ari nya ku iya, raban apai indai mega dipinta bela meratka isu nya lalu nen- tuka kandang ngelingi rumah mega beresi.
Nitihka penerang KPK Datuk Dr. Noor Hisham Abdullah mansa Farhan Abdullah bisi ngasai diri renga kena Hari Dua tu tadi kelimpah bisi mandangka tanda ba jari enggau kaki sereta pedis ba mulut hari seiti.
Ku iya, nembiak mit nya dibai berubat di Klinik Pengerai Daro udah nya sebedau dipindah ngagai Spital Daro.
Pengudah pendiau enda berinsur manah, mansa diangjung ngagai Spital Sibu ngambi tau diperubat enggau silik agi tang iya mutuska seput jam 2 pagi 28 Julai.
Pemidang Farhan ku Noor Hisham ketegal jangkit kuman ba lempuang asil jangkit HFMD lalu chunto klinikal udah diambi dikena nentuka kebuah ke endar.
Berindik enggau nya iya ngelalau apai indai ke bisi anak mit ngambi atur ke patut ngambi ulih nyeliah anak sida dirampit HFMD.
Tu nyengkaum meresa tapak jari, mulut enggau ikas pengangat tubuh nembiak sebedau sida tama ke kelas. Dato Sri Fatimah Abdullah Menteri Pengintu Pengelantang, Komuniti, Orang Indu, Ruang Bilik enggau Pemansang Anak Mit