Projek Pensil deka muka kelas Tuisyen Jaku English

KUCHING: Pengemun Projek Pensil, Norina Umoi Utot ngepunka siti agi projek iya nya Kelas Tuisyen Jaku English.

Kelas Tuisyen ke udah dipun ba bulan Novemver 2017 nya nyadi siti agi inisiatif Norina ngambi tau mantu nembiak sekula nyulut ba pengawa besekula.

“Projek baru kami, kelas tuisyen jaku Inggeris udah berengkah kenyau taun 2017.

“Kelas tu diberi pechuma ngagai nembiak pra-sekula enggau sekula primari ke beumur entara 4 nyentuk ngagai 9 taun,”ku iya rambau ngemujur Projek Pensel di Kampung Sepan, Balai Ringin bedau lama tu tadi.

Norina nambah, kelas tu- isyen nya disedia tiap kali maya pemisi panjai sekula.

Iya ngarap kededua projek ulih nyaup ngemansang pengawa besekula nembiak di menua pesisir baka ke di Pelilih Sri Aman.

Ngenang sentang Projek Pensel ke dipun ba bulan Jun 2016, iya ngarap bantu nya ulih ngelempung tating belanja apai indai nembiak ba pekara pelajar anak sida.

Tajapan gawa ba industri minyak enggau gis di menua Oman, Norina suah mulaika diri ke menua ketegal ti keran deka mantu rayat kelimpah ti ngemujur projek pensel.

“Nembiak maya ke diatu nyadi aset menua ke beguna lalu sida modal mensia ti deka nyadi ketuai jemah ila.

“Ketegal nya kitai meseti meri sukung ngagai raban nembiak tu,”ku Norina.

Nengah inisiatif projek pensel, iya mega ngarap gerempung ke ukai dikuasa perintah(NGO), kelab, kompeni enggau ijinsi perintah ulih sama bela meri kerejasama ngangkatka kualiti pelajar di nengeri tu

“Nyentukka seharitu, urung 1,000 iku nembiak sekula primari kelebih agi sida ti deka ngambi peresa UPSR udah dibantu nengah Projek Pensel kenyau taun 2016.

“Projek ke diatur ba sekeda rumah panjai di Sri Aman nyendia bantu ba perengka nulis lalu tebal agi mantu sida ke kurang penatai pemisi,”ku iya.