Penuduk Ketuai PKR Miri enggau Baram nadai diperebut ba pengawa bepilih parti
MIRI: Penuduk Ketuai Parti Keadilan Rakyat (PKR) Miri enggau Baram enda diperebut ba pengawa bepilih parti ngaul lima pampang di bagi menua Utara Sarawak.
Mandal Ketuai Indu PKR Besai, Voon Shiak Ni madahka Kaban Parlimen (MP) Miri Dr Michael Teo enggau Roland Engan deka ngetanka penuduk Ketuai PKR Miri enggau Baram ba pengawa bepilih parti taun tu.
“Naka diatu kitai udah dipadah ke alai penuduk Ketuai Pampang Miri enggau Baram enda diperebut,” ku Voon nerang ngagai pengarang berita kemari.
Ku Voon, opis Palan Servis PKR Miri nyadi palan nganjung nama bepilih parti ungkup lima pampang di bagi menua Utara Sarawak.
Bala pengari ari pampang Miri, Sibuti, Limbang, Lawas enggau Baram udah ngambi pom nyadi chalun ti disadung berengkah urung pukul 8 pagi nyentuk pukul 5 lemai.
“Kelimpah ari pangku pengawa Ketuai, bela diperebut iya nya penuduk Sapit enggau Mandal. Bisi 15 iku kaban komiti mega deka dichiri,” ku Voon nerang, ke lalu nyadi Sekretari Politik Dr Teo.
Pengawa ngundi penuduk diperebut ungkup semua pampang parti di Sarawak deka diatur kena 6 Okto- ber tu.
Ngelansa pasal Komiti Kereja Parlimen Miri, ku Voon, sepanjai bulan tu, palan servis Dr Teo udah nerima penatai sepenyampau 350 iku peranak.
Ari sebana ti diterima, lebih 100 surat udah dianjung ngagai bemacham ejensi ungkup timbal enggau atur pengawa ti patut.
“Antara isu dibantaika sida baka penanggul pala tanah, minta tingki enggau surat pengada, penanggul ba parit, jalai rusak enggau penanggul ditapi bala ketuai komuniti,” ku iya nerang.
Ku Voon, kena Hari Satu tu (30 Julai), Opis PKR Miri deka ngatur randau ` networking’ keterubah iya begulai enggau lebih 100 ejensi enggau serakup ditu.
Antara batang tuju randau nya dikena nempa sistem rentayan ti manah agi enggau semua ejensi ditu sereta ngenegapka agi kaul kerejasama pulaika pemaik servis ungkup rayat.
“Kitai deka naka ulih gawaka pengawa meri servis ngagai peranak Miri,” ku iya.
Komiti Kereja Parlimen Miri diatur sepuluh staf iya nya Wong Yie Sing, Korina Mang, Peter Abong, Phillip Asry, Michelle Teo, David Hii, Paul Wong, Bolhan Salihi, Ngo Li Peng, Steve Teo enggau siku auditor bertauliah.