Empat rumah panjai di Machan minta Jalai Ladang Sawit Kelimut dikemanah
KANOWIT: Peranak ari empat buah rumah panjai di Machan ditu ngansak raban bekaul ngemanahka jalai sida enggau naka pengelengkas baka ti udah disemaya ngelama tu.
Empat buah rumah panjai nya iya nya Rumah Shamsuddin, Rumah Melaka, Rumah Untol enggau Rumah Dim keke bela nengah Jalai Ladang Sawit Kelimut.
Nitih ku pengari peranak ti enggai dikelala nama, jalai nya besambungka semua rumah panjai nya ngagai jalai besai nyentuk Pasar Machan.
“Sarikat ladang nya udah nyediaka jalai ngagai kami lalu raban perintah patut nyeleti jalai nya baka ti udah disemaya sebedau tu.
“Nyentuk sehari tu, jalai nya agi jai lalu pengawa nyeleti iya patut dirumban,” ku iya madah ngagai Utusan Borneo ditu, ensana.
Iya madahka jalai nya balat enda likun ditengah laban bisi beberapa tiku jalai ti mit lalu tau ngeruga pengelikun maya entukar begelih.
“Kelimpah ari nya, bisi beberapa bagi jalai ti belubang.
“Kami kala mantaika penanggul tu ngagai menijar ladang nya ngambi nganchau kerangan ba jalai tu.
“Taja pia, kami dipadah jalai tu iya nya jalai sawit ti digaga sarikat ladang lalu tentu mega pengawa bukai meseti raban bukai nyeleti iya,” ku iya madah nyemetak.
Iya mega madahka raban di ladang udah badu agi ngintu jalai nya ketegal beberapa pugu pekara.
Ku iya, jalai nya mar ditengah entukar mit kelimpah ari entukar 4WD.
“Kami peranak ti diau di kandang ladang berasai enda puas ati enggau gaya jalai ti enda diintu ambika chunto, babas repa nadai ditebas, jalai belubang, jalai sekut enggau mayuh tiku jalai.
“Nya kebuah kami ngarapka bala di ladang diatu ulih meri kerejasama ngagai kami seraya nganti semaya sebedau tu dikeamatka perintah kelebih agi pengari rayat di DUN Machan enggau Par- limen Kanowit,” tandu iya.
Kenu ku iya, bala tuai rumah ari empat buah rumah panjai nya kala sebanaka penanggul tu ngagai pengari rayat sida tang bedalihka jalai nya jalai ladang sawit diempu sarikat ti ngasuh sida napi pemar ngagihka belanja dikena nyeleti jalai nya.
“Tang tu ukai kedalih laban chara bukai tau dipejalai antara perintah enggau sarikat nya ngambi bela teulihka penguntung pulaika pengelantang rayat.
“Rambau pengawa bepilih nyin tadi, pengari rayat kami bisi besemaya deka nyemin jalai tu ari Rumah Shamsuddin, Nanga Semayam ngelawa simpang Machan/ Kanowit enggau ungkus sepenyampau RM1.6 juta.
“Tang nyentuk sehari tu, apin dipejalai lalu kami terus napi bemacham penanggul seraya ngarap enggau besampi nadai sebarang penanggul enda disadang nyadi ngagai kami maya betengahka jalai tu,” ku iya enggau ati asa.
Iya nerangka semua sida agi ngarapka pengari rayat ngamatka semaya baka ti udah dipadah sebedau tu.
“Semua kami enggau baruh ati ngarapka pengasih ari pengari rayat ngambi mendingka sebana kami tu. Pejalai lalu keamatka semaya kita sebedau tu pulaika pengelantang enggau pengelikun kami,” ku iya nampung silik.