Didi Udin dipilih nyadi ketuai Ketua Protem PPBM Samarahan
KOTA SAMARAHAN: Parti Pribumi Bersatu Malaysia (PPBM) terus nerima timbal manah kenyau ari pengawa numbuhka Komiti Pemungkal PPBM Pampang Sarawak kena 19 Julai tu tadi.
Parti nya diatu mujur ngerembaika sayap sida ari pengawa numbuhka Komiti Protem PPBM Sitak Parlimen Samarahan ti meda Didi Udin dipilih enggau disukung semua nyadi Ketuai Protem PPBM Sitak Parlimen Samarahan kemari.
Aum pengawa bepilih komiti protem diatur di Balai Suarah Kota Samarahan nya mega meda pangku pengawa Sapit Ketuai Protem PPBM Sitak Parlimen Samarahan disandang Efendi Putit.
Seraya pangku pengawa Mandal Ketuai dipenggi James Lindang, Ketuai Srikandi Maslinda Matmerdeka enggau Ketuai Armada Roslee Jarawi.
Pangku pengawa Sekretari dilempai ngagai Siti Norasyikin Addris, Tukang Wang disandang Rohaida Abdullah lalu Ketuai Pemadah David Linang Janting.
Semilan kaban komiti dipegai Hayalan Bujang, Suhaili Maseri, Salihin Daut, Mohd Zaidi Ahmad, Zamri Ujang, Ini Jini, Sabarudin Putit, Nur Faaiza Syahira Nurulihsan enggau Nuri Ismail.
“Timbal chukup manah ari peranak Samarahan lalu kitai bisi tagit ulih ngambi kaban abis nadai 1,000 iku sebedau pengawa bejadi dalam bulan September tu,” ku Didi leb- uhka dirandau ensana.
Tambah mega ku iya, kandang diatu raban sida nerima pinta chukup manah ari peranak menua nya, kelebih agi ari sida nembiak.
“Kitai andal enti rejista PPBM Sitak Parlimen tu udah dikemendar, peminta nyadi kaban dipelaba deka nambah,” ku iya.
Kelimpah ari nya, ku iya, pengawa numbuhka komiti protem sitak Parlimen Samarahan nampung pengawa dikena nyapai juluk numbuhka PPBM di nengeri tu nyadi nyata.
Nangkan nya ku iya, tu mega dikena nyediaka diri tumu sebedau napi Pengawa Bepilih Nengeri Ke-12 (PRN12) dalam taun 2021 ila.