Beguna amat pengawa audit pengelikun di sekula lebih agi sekula ke udah lama, ku Lee
SIBU: Opis Menteri Pelajar Malaysia (KKM) enggau Opis Pelajar Nengeri Sarawak ( JPNS) dipinta ngambi ngemeratka pekara pengelikun dikena nyeliah penusah enda disadang nyadi mayuh agi dudi hari ila.
Chairman Institusyen Pengelikun enggau Pengerai Pengereja Pengawa Menua (Niosh) Tan Sri Lee Lam Thye ngenataika pekara tu bepun ari penusah ninggang siku pengajar, niang Catherine Janet Tiwi, 25, ti bebadi ba penusah angus sekula primeri di Mulu, hari Tiga minggu siti tadi.
Lee besebutka pemesai reti audit pengelikun di sekula lebih agi sekula ke udah lama.
“Di Sarawak agi mayuh sekula menua pesisir udah lama ditumbuhka lalu ba aku semua kitai patut bejadika penusah ninggang niang nyadika teladan.
“Nya alai, ba runding aku piak Opis Menteri Pelajar enggau piak bekaul di nengeri tu patut berandau enggau silik sereta berunding baka ni nyeliahka penusah baka nya enda nyadi agi.
“Kitai sinu amat ngenang penusah ti nabanka nyawa baka tu,” pia ku iya maya berandau enggau pengarang berita, ensana.
Lee madah, enti udah dirandau enggau silik, iya ngarap sida ke bekaul ulih numbuhka audit pengelikun baka ke dibantai Kaban Parlimen Puncak Borneo, Willlie Mongin.
“Aku nyukung penemu iya laban audit pengelikun tu beguna amat,” ku iya madah baru.
Niosh ku Lee, besedia meri bantu baka program ‘OSH in School’ dikena nentuka sekula nyadi endur ti likun alai belajar sereta gawa.
Iya madahka program nya kebendar iya ulih ngembing pengajar enggau bala nembiak bekaul enggau isu pengelikun.
Awak tu mega dikena Lee ngenataika penyinu ati ngagai kaban belayan niang Catherine.
Di Sarawak agi mayuh sekula menua pesisir udah lama ditumbuhka lalu ba aku semua kitai patut bejadika penusah ninggang niang nyadika teladan. Nya alai, ba runding aku piak KKM enggau piak bekaul di nengeri patut berandau enggau silik sereta berunding baka ni nyeliahka penusah baka nya enda nyadi agi. Tan Sri Lee Lam Thye Chairman Niosh