SJK Chung Hua Stampin begunaka begunan besai, perengka guna baru
KUCHING: Sekula SJK Chung Hua Stampin udah manggai 80 taun diatu begunaka blok sekula baru ke patut digaga besai agi ngipak enggau pemansang peminta ke deka nganjung anak besekula dia di Jalai Sg Tapang di sitak Kota Sentosa ditu.
Sekula nya agi mengkang sekula ke digaga ari kayu berengkah ari penumbuh sekula nya dalam taun 1938 lalu datai ke seharitu, bala nembiak sekula ke besekula dia ngena pemisi perengka guna ke enda manah dikena agi.
Kena nyendiaka rampa ke lantang agi endur belajar, opis kaunsil sekula nya ke betuaika Pui Wen Mui berunding deka ngumpul wang turu kena nirika sebuah sekula konkrit.
Nitih ku Tuai Pengajar sekula nya, Ngu Siong Ngo madahka sekula nya enda ulih nerima bala nembiak sekula ke bisi ati deka belajar ba sekula nya, laban berundingka sekula ke digaga ari kayu nya, enda ulih nguan pemayuh nembiak.
“Blok sekula kami agi mengkang sekula kayu, alai kami enda ulih nerima kelalu nembiak laban pendiau nembiak ke selalu belanda tauka engkejuk.
“Ke pengelikun bala nembiak besekula ditu, kami semina nerima urung 35 nembiak besekula ditu, sebuah kelas setaun,” ku iya madah maya meri licha ngagai Sapit Menteri Pengawa Dagang enggau Pekara bebeli Barang, Chong Chieng Jen, ti mega nyadi Kaban Parlimen (MP) Stampin sereta Kaban Kunsil Nengeri (ADUN) Kota Sentosa, kemari. Maya penemuai ngagai sekula nya kemari, Chong bisi bejalai sebelah sekula nya, ke disempulang ulih Pui ke meri pemadah ngagai Chong.
Ngu madah naka kediatu, sekula nya bisi 158 nembiak sekula, 76 peratus bebansa China.
Ku iya, SJK Chung Hua Stampin napi pengurang perengka guna ke ngipak ke sekula ke ulih dikena bala nembiak dia.
Ambika chunto ku iya, palan macha sekula nya diatu digaga nyadi bilik baum tauka palan alai ngagai aktiviti sekula sereta pengawa bukai.
Iya mega madahka sekula nya, ke bisi 15 iku pengajar enggau pengereja pengawa mega bisi nyendiaka kelas belajar pengarap ngagai empat iku nembiak.
Pui madahka opis kaunsil sekula nya berunding deka ngiga pengabis kurang pan urung RM3 milion kena ngaga blok sekula empat ringkat ke bisi 20 buah kelas, opis sekula, palan macha bilik sains sereta perengka guna bukai.
“Kami ngarapka, baik nya Perintah Besai tauka Nengeri, deka mantu kami betatika kos projek nya taja pan ari sepiak kami sigi ngiga jalai ngumpul wang turu nya.”
Iya madah sekula nya berengka muka palan nya dalam taun 1936, lalu direjista dua taun udah nya.
“Opis Kaunsil sekula berunding deka ngatur ulang taun ke-81 sekula taun baru tu ila, lalu ngarapka ulih ngiga wang turu ke sekula tu kena ngaga projek sekula tu,” ku iya.
Ba aum media ti betuaika Chong udah nya madahka opis kaunsil sekula nya udah nganjung surat ngagai Opis Tanah enggau Survei (JTS) deka meli tanah sepiak sekula nya, ngambika ulih alai ngaga projek sekula nya.
Chong madah iya beratika projek genturung pendiau majak digaga di Jalai Sg Tapang, alai peminta endur anak besekula pan nambah.
Ku Chong, sekula nya begunaka entara dua ngagai tiga ikar tanah kena ngemesaika sekula nya, ngambika bisi endur alai nganjung anak sida ke diau di sitak nya besekula.
Kediatu, sekula ke berumur 80 taun nya didirika ba tanah setengah ikar aja.
Ku iya, ba JTS enggau Perintah Menua Sarawak, timpuh ngatur meli tauka ngambi tanah nya ukai pengawa ke lama.
Chong, ti mega seiku luyar, madah ngagai sida ke bempu tanah anang irau pasal tanah sida iya dibeli tauka dikena ulih Perintah Menua.
Ku iya, sida ke bempu tanah ke diambi Perintah deka dibayar nitihka rega makit.
Nyema orang ke bempu tanah nya enda lantang ati enggau penyampau ganti rugi ke dibayar ulih Perintah Menua, ku iya, sida ke bempu tanah nya tau mai kes nya ngagai kort ngambika rega tanah nya ulih dipansik baru.
“Nya alai, anang takut enti tanah kita kena beli. Kami nyukung pengawa bebelika tauka ngambi tanah ke pengelantang mensia mayuh baka kena ngaga rumah, ngemesaika sekula, tang kami ngutuk pengawa meli tauka ngambi tanah ke penguntung kroni aja baka kena ngaga kondominium ke mar,” ku iya.