TVET udah mandangka pemujur ke modal mensia sereta laku ba makit pengawa
SIBU: Pengawa latih sereta Pelajar Vokasional enggau Teknikal (TVET) udah mandangka pemujur ari pelajar tu ke ulih ngeluarka modal mensia ke mayuh diguna ba makit kereja sereta berat ba pengawa teknikal.
Direktor Kanan (Kompetensi) Kolej Komuniti enggau Politeknik, Opis Pelajar sereta Opis Menteri Pelajar, Dr Rashahidi @ Rusdi Mohamood madah, tu bepelasarka statistik ti bisi dikeluarka datai ngagai Mac 2018 madahka, graduet ari Politeknik Mukah nyapai urung 92.3 peratus mujur teulihka pengawa.
“Pemujur tu enda dijangka alai opis menteri deka beben- dar agi nyapai pemujur 100 peratus,” ku iya madah lebuh bejaku ba atur pengawa Konvokesyen Politeknik Mukah ti digaga di Mukah hari Enam tu tadi.
Rashahidi mega ngelalau bala graduet anang kelalu ngarap lalu bulih pengawa udah sida iya graduet.
“Enti nitih, pemisi peneleba latih ke di ulih sida iya ba TVET di Politeknik Mukah, graduet bisi pelunag ke besai agi ulih nyadi orang dagang ba pengelandik sida,” ku iya.
Ba atur pengawa nya mega, Direktor Politeknik Mukah, Lt. Col. Federated (Bersekutu) (PA) Abdubrani Yunus mega ngelalau bala graduet anang kelalu arapka jaku ke enda manah ke disema ba sida ba pegelandik teknikal sereta vokasional sida iya.
“Chara gawa dalam pengawa teknikal nyangka enda tak manah endar dibanding enggau sida ke gawa ba opis, tang ingat, taja pan chara ngaga pengawa nya enda sebaka, tang pengawa kita dalam pengelandik teknikal enggau vokasional nguasa pemisi ke besai,” ku iya.
Abdubrani mega minta bala graduet anang semina belajar naka tu aja, tang pajakka pengawa deka ngiga mayuh agi penemu nengah kuasa diri empu ngambika sida iya ulih nambah mayuh agi pemaik ngagai rega makit ba batang pengawa ke digaga sida iya.
Ba atur pengawa nya, urung 918 graduet nerima Diploma sida iya.
Sapit Direktor Politeknik Mukah ( Akademik), Zaulkapli Mohammad sereta Sapit Direktor Politeknik Mukah (Sukung Akademik), Iskandar Reduan bela bisi enggau ngulu atur pengawa nya.