MESTR nadai kala ngelangkar sebarang perambu ngemaduka kunterik bekal minyak sekula

KUCHING: Opis Menteri Pelajar, Sains enggau Pansik Teknologi ( MESTR) nyemetak madahka raban sida nadai kala ngelangkar sebarang keretas perambu ngemaduka kunterik ke bisi ba bekal minyak ngagai sekula di Sarawak.

Nitih ku iya, kunterik bekal minyak terit dipejalai antara Opis Menteri Pelajar Malaysia enggau Jepak Holding Sdn. Bhd.

“MESTR ukai raban ngaga kunterik. Nya kebuah, atur pengawa enggau pengawa matau pemaik pengawa kunteriktor di baruh bidang kuasa Opis Menteri Pelajar Malaysia.

“Taja pia, MESTR deka merambu ngambika sekula besemak enggau grid kuasa karan disambung enggau bekal kuasa karan lalu ukai bepanggai ngagai injin api ngulihka kuasa karan,” ku iya ba penerang berita ti dikeluar ditu, kemari.

Tu dikena nimbal penerang ari Jepak Holding Sdn. Bhd. ti dikeluar ba surat berita kena 28 Julai bebatangka jaku ‘Jepak Holdings dissapointed over termination of diesel contract’.

Pia mega nengah penerang tu, MESTR deka madahka Menteri Dato Sri Michael Manyin Jawong enda nemu pengawa ari Jepak Holding Sdn. Bhd. deka berandau enggau iya.

“Ketegal udah diripot ba media ke alai pekara tu di baruh pansik SPRM, nya kebuah kitai (MESTR) enda nerang silik pasal pekara tu,” ku iya.

Apin lama ke udah, ba surat berita menua tu, Jepak Holding Sdn. Bhd. mantaika pengasa diri ngagai perambu MESTR ngagai Opis Menteri Pelajar Malaysia ngambi ngemaduka kunterik sida ti meri bekal minyak ngagai sekula di nengeri tu.

Direktor Ngatur Pengawa Jepak Holding Sdn. Bhd. Abang Saidi Abang Samsuddin madahka sida enda ulih berandau enggau Dato Sri Michael Manyin meri penerang pasal pekara nya tang ditulak laban penaggul nya dikategorika nyadi kes berprofil tinggi.