BDA dipuji udah ngubah Bintulu nyadi bintang ke sitak menua tengah Sarawak
MIRI: SMK Chung Hua Miri dipadu ngempu gelar ke pekit pengawa bebaris entara semua sekula ti digaga beserimbai enggau ‘Perbarisan Tahunan 2018 Hari Palang Merah Sedunia’ (PTHPMS 2018) ditu, kemari.
SMK Chung Hua Miri mega ngempu gelar pengawa kawad kaki kategori Unit Nembiak lalu ditangkan enggau penuduk lumur dua diempu ulih Sekolah Menengah Kebangsaan (SMK) Lutong lalu ketiga, SMK St Joseph.
Nasit ke manah mega bela miak SMK Chung Hua Miri lebuh sida iya menang kategori Kawad Berirama ngalah- ka SMK St Joseph, ke bulih lumur duai engga ketiga, SMK Lutong.
Ba bagi kategori Unit Link, Sekolah Kebangsaan ( SK) Lutong nyadi champian ba kategori nya, lalu ditangkan enggau SK Chung San (lumur dua) enggau SJK Chung Hua Krokop (ketiga).
Lalu ba kategori pekayan beragam le pengabis manah diempu ulih SMK St Joseph (Unit Nembiak) enggau SJK Chung San (Unit Link).
Palan Sunflower Miri mega enda pulai mai jari puang lebuh tim nya nyadi champian Kategori Istimewa.
Gelar bukai ti bisi diberi, iya nya Setipikit Kepujian 2018 (nembiak) alai penerima ke bulih nya, Easther Tie Jia Ying, Chang Sze Ren, Chang Sze Ying enggau Voon Qing Long.
Ba bagi semilan penerima Gelar Setipikit Kepujian PBSM, iya nya Selvaraj Grapragasem, Chow Su Bee, Salina Farhana Azmi, Tony Jantan, Wong Huang Yew, Chang Huen Nep, Chieng Mee Ling, Angela Charle enggau Ting Chiew Hie.
Atur pengawa meri perais ngagai pemenang dipejadi ulih Chairman Gerempung Bulan Sabit Merah Sarawak, Datuk Patinggi Tan Sri Dr. George Chan Hong Nam. BINTULU: Opis Bintulu Development Authority (BDA) ke nyadi sebuah opis kandang menua (PBT) bisi kuasa ke besai di Sarawak dalam kapasiti sida iya ngubah Bintulu nyadi bintang ke sitak menua tengah di Sarawak, ku Kepala Menteri Datuk Patinggi Abang Johari Tun Openg.
Ari sebuah genturung pendiau kampung endur orang berikan diau, iya madah dalam kandang 40 taun BDA udah ngangkatka Bintulu nyadi sebuah lanskap pemansang di Bintulu.
“Dalam semangat berakup, dalam kandang 40 taun tu ila, Bintulu deka majak nyadi sebuah sitak menua ke dikemansangkla lalu aku meri puji ngagai BDA ke nyambut ulang taun ke-40.
“Ngarika Perintah Menua enggau Kaban Opis Kaunsil BDA, aku meri terima kasih ngagai Opis Kaunsil BDA enggau pengereja pengawa situ, ari pemun opis tu dibuka datai keseharitu ke pemujur pengawa ke udah digaga kita di BDA,” ku Abang Johari ti mega nyadi chairman BDA, ba atur pengawa makai lemai nyambut ulang taun 40 taun BDA di Dinner World Restaurant ditu, malam hari Enam tu tadi.
Sama bisi enggau ngulu atur pengawa makai lemai nya, Menteri Utiliti, Dato Sri Dr Stephen Rundi Utom, Menteri di Opis Kepala Menteri ( Integriti enggau Ombudsman) Datuk Talib Zulpilip, Kaban Parlimen Bintulu, Datuk Seri Tiong King Sing, Menijer besai BDA Rodziah Morshidi, kaban kaunsil BDA, ketuai komuniti, pemesai BDA senior enggau bini sida iya.
Abang Johari madahka dalam kandang 40 taun BDA udah mujur ngubah lansakp Bintulu ari sebuah kampung berikan ke mit ngagai sebuah nengeri ke besai enggau pemayuh mensia ke diau di pelilih menua nya manggai urung 251,000.
“Reti nya, BDA baruh pegai sereta jaga pemesai ke dulu agi ari taun 1978 datai ke seharitu, udah mayuh mai pemansang ngagai sitak menua tengah Sarawak tu.
“Aku bisi nerima timbal, iya nya Bintulu, sebuah nengeri ke ditusun enggaqu manah, dalam sukut pemansang ke digaga, sereta perengka guna ke mensia mayuh ke disengkaum enggau pengadung sitak sereta tusun pemansang ditu,” ku iya.
Abang Johari muji pengawa ke udah digaga Tun Abdul Rahman Ya’akub ke muka Bintulu, Pehin Sri Taib Mahmud ke mayuh udah mai pemansang ngagai Bintulu lebuh mungkal Opis Regional Corridor Development Authority (Recoda) enggaub Palan Industri Samalaju, sereta niang Pehin Sri Adenan Satem ke ngenegutka Perintah.
Pemesai tu ku iya, ke udah ngemansangka Bintulu baka gaya iya kediatu, ke meri iya palan ke manah nyadi Kepala Menteri Sarawak majakka pengawa ngemansangka minyak enggau gis di nengeri nya.
Iya madah dalam kandang 40 taun tu ila, Bintulu deka nyingkang ke mua lalu nyadi sebuah bandaraya ke ditusun enggau manah di Malaysia.
“Kebuah iya bansa nya, laban Bintulu ngembuan pemisi, Bintulu bis pemaik ari sitak bukai, nya alai enti Bintulu dikemansang enggau chuan ke sebaka enggau bandaraya ke ditusun enggau manah, jemah ila, iya deka nyadi baka bintang di menua tu,” ku Abang Johari.
Bintulu ku iya, bisi penguntung ari pemisi rampa menua iya empu tang pemisi nya enda ulih ngemansangka sitak nya.
“Enti kitai beratika Japan enggau Korea, sida iya nadai pemisi tang ngembuan struktur ekonomi ke tegap laban kreativiti sereta pemerat pemesai sida iya,” ku iya.
Abang Johari madah jematan ke nyadi ikon digaga ba atas Sungai Kemena nyambung Bintulu ngagai sitak Jepak deka digaga taun baru tu ila deka nyadi kelai di Bintulu.
Iya madah dalam timpuh ke panjai, sitak Jepak deka nyadi bandar baru ke ulih matak temuai laban mayuh agi projek deka digaga ba seberai sungai Kemena ba pengawa ngaga Bintulu nyadi sebuah bandaraya ke nyelai di Sarawak.
“Enggau Kidurong enggau Samaju sereta ditu, kitai bisi mayuh endur ke manah, aku pechaya kitai ulih nambah pemisi, iya nya enti Bintulu digaga mayuh agi pemansang dagang temuai sereta pampang servis bukai, mensia mayuh deka datai kitu, lalu kitai ulih ngangkatka pemerat sektor bukai lebuh kitai ngemansangka Bintulu,” ku iya.
Sebedau nya, Rodziah madah BDA udah numbuhka wang turu pengelantang pendiau ke bala pengereja pengawa opis nya, enggau pemun geran RM600,000 lalu nangkan nya, Abang Johari bisi madahka Perintah Menua deka meri RM400,000 ngagai wang turu sida iya.