Manyin ngenadaika opis menteri iya deka nginsil kunterik Jepak Holding

KUCHING: Opis Menteri Pekara Pelajar, Sains enggau Pansik Teknologi nadai merambu nginsil kunterik kompeni pemekal diesel ngagai sekula di menua pesisir.

Menteri, Dato Sri Michael Manyin madah tuduh ari sekeda piak nya enda amat ke alai opis menteri nadai kuasa ba pekara nya.

Ku iya, kunterik mekal diesel ke diguna injin api nya entara Jepak Holding enggau Opis Menteri Pelajar Malaysia.

“Opis Pelajar Sarawak enggau Perintah Sarawak nadai kaul enggau sempekat sereta kunterik mekal diesel tu.

‘Ketegal nya kitai nadai kuasa merambu deka nginsil kunterik nya munyika tuduh sekeda,’ku iya.

Manyin mansutka penerang nya ngagai pengarang berita di Kampung Skio,Bau kena Hari Enam tu tadi.

Iya nimbal tuduh Jepak Holding ti madah opis menteri iya (Manyin) merambu nginsil kunterik kompeni pemekal diesel ke sekula di serata Sarawak.

Tengah bulan Jun 2018 tu tadi, sekeda sekula di nengeri tu napi penusah nadai bekal lekterik pengudah bekal diesel ke diguna injin api enda datai di sekula.

Di Sarawak, bisi 369 iti sekula ti nadai bekal lekterik tang nguna injin api diesel dikena ngulihka kuasa lekterik.

Berengkah 1 Januari 2017, Jepak Holding diberi kunterik mekal diesel ngagai 369 sekula nya ungkup timpuh 3 taun.

Ngenang kaul bukai, Manyin madah perintah nengeri ngagihka RM50 juta dikena nyendia ka bekal lekterik ngagai 113 sekula dikandang menua pesisir.

Pekara nya ku Manyin udah diputuska Kepala Menteri ba aum kabinet bedau lama tu tadi.

Ku Manyin, semua 113 sekula nya enda jauh ari grid lekterik tang mengkang nguna injin api.

“Opis Pelajar ( Sarawak) tetemuka 113 sekula ke enda jauh ari grid lekterik lalu ulih disambung ngagai grid nya tang mengkang nguna injin api,’ku iya.