Ketegal nya bala nembiak belajar dalam bilik kelas ke angat sereta putus bekal ai ke dipam ngena kuasa elekterik
KUCHING: Seratus lima puluh semilan iku nembiak di SK Nanga Kesit, Lubok Antu dalam timpuh urung dua minggu ke udah belajar dalam bilik kelas ke angat pengudah injin api sekula nya rusak.
Nambahka pemerinsa, bekal ai ngagai sekula nya mega putus ketegal ai ari tangki semina ulih dipam ngena kuasa lekterik.
Nitihka penerang ari siku pengajar di SK Nanga Kesit, iya nya Pengajar Douglas Patan, pemar enggau pemerinsa ke ditapi nembiak enggau pengajar nya bepun ari injin api.
Ku iya, sekula nya sigi nadai bekal kuasa lekterik ari grid lekterik lalu ngelama ke udah bepanggai ba injin api endur ngulihka kuasa lektrik.
“Dulu agi ari tu SK Nanga Kesit bisi dua iti injin api, iya nya siti dikena maya hari siang pengelama timpuh 12 jam lalu siti agi dikena maya malam ungkup timpuh 12 jam mega.
“Siti rusak ba taun 2017 lalu mengkang enda dikemanah nyentuk ke sehari tu ke alai nya ngujungka siti ke manah dikena pengelama timpuh 16 jam ninting hari,’ku Douglas.
Kena 22 Julai tu tadi ku Douglas nambah, injin api ke dikearap nya rusak lalu nya mih pun pemar enggau pemerinsa ke ditapi nembiak enggau pengajar SK Nanga Kesit.
Empas ari putus bekal lekterik nya ku Douglas, ngujungka nembiak belajar ba bilik ke angat ari jam 7.20 pagi nyentuk ngagai kelas tambah muak ke lemai.
“Maya malam hari, nembiak belajar nguna api dian sereta lampu pichit. Sekeda pengajar mai injin api kediri empu ke semina ungkup guna ruang bilik diri aja.
“Nambahka pemerinsa, bekal ai pan nadai. Tajapan bisi sungai besemak, tang mayuh enda berani nguna sungai ketegal ti bisi baya.
‘ Pemar ke bukai, sekula enda ulih nyimpan lauk ungkup nembiak ke diau di buding lalu tusun pengawa sekula pan enda ulih ditembu,’ku iya.
Berindik enggau nya Doug-
Dulu agi ari tu SK Nanga Kesit bisi dua iti injin api, iya nya siti dikena maya hari siang pengelama timpuh 12 jam lalu siti agi dikena maya malam ungkup timpuh 12 jam mega. Douglas Patan Pengajar SK Nanga Kesit
las ngarika semua SK Nanga Kesit minta Opis Pelajar Sarawak enggau Opis Menteri Pelajar Malaysia beratika pekara tu enggau berat lalu diputarka enggau lengkas.
“Perundingka enti pemar tu enda diputar bebulan. Nembiak primari 6 deka napi peresa UPSR ba bulan September tu,’ku iya.
Douglas pechaya SK Nanga Kesit ulih disambung ngagai grid lekterik ketegal ti dikelingi tiga opis ejensi perintah.
Ku iya, Tadika Kemas, klinik enggau opis betanam betupi ke bisi bekal lekterik 24 jam semina 50 meter aja penyauh ari SK Nanga Kesit.