Nya nitihka pemutus ke digaga Kepala Menteri Ke-5 niang Tok Nan ti madamka bayar ba semua tol di serata nengeri tu
KUCHING: Rayat nengeri tu kelebih agi peranak menua pesisir ti agi ngena servis feri, dipelabaka deka ngena servis nya ti enda bebayar lebuh manggai taun 2019.
Kepala Menteri Datuk Patinggi Abang Johari Tun Openg madahka, nya berindik ari taun baru perintah nengeri dipelabaka deka madamka bayar feri serata nengeri tu, ke lalu meri servis enda bebayar ngagai rayat kelebih agi peranak menua pesisir.
Iya madahka nya nangkan pemutus ke digaga Kepala Menteri Ke- 5 sebedau tu niang Pehin Sri Adenan Satem tauka Tok Nan ti madamka bayar ba semua tol serata nengeri tu.
“Enti sebedau tu niang Tok Nan madamka bayar tol, diatu kitai benung nentuka engka dipelabaka lebuh manggai taun baru kitai deka madamka bayar feri, reti nya ngena servis nya enda bebayar.
“Aku udah minta Tan Sri Datuk Amar James Jemut Masing (Menteri Pemansang Infrastruktur enggau Perengka Pengangkut) ngira berapa semua ungkus ke patut dibayar perintah nengeri ngagai pengemeran feri.
“Aku deka madahka haribulan kemaya bayar feri nya dipadamka, lalu tu ila udah tentu deka ngelantangka pejalai raban bansa kitai ke diau di menua pesisir,” ku iya.
Abang Johari mansutka
Enti sebedau tu niang Tok Nan madamka bayar tol, diatu kitai benung nentuka engka dipelabaka lebuh manggai taun baru kitai deka madamka bayar feri, reti nya ngena servis nya enda bebayar. Datuk Patinggi Abang Johari Tun Openg Kepala Menteri Sarawak
pekara nya lebuh ti bejaku ba program CM Abang Jo Begulai Enggau Media, -The Way Forward, ti diatur ba sebuah hotel ditu, kemari.
Ba program nya Abang Johari ngenang semua pemansang ke udah dipejalaika sereta dipejalaika sepemanjai timpuh setaun enam bulan iya nyadi Kepala Menteri Ke-6 Sarawak.
Dalam timpuh setaun enam bulan nganti penuduk Tok Nan lalu nyadi Kepala Menteri Ke-6, Abang Johari ngenang madahka tim ke ditumbuhka Tok Nan ke diatu betuaika iya empu udah neruska projek pemansang ke udah dipejalai sereta diperambu niang nya.
Abang Johari berebak enggau tu mega ngenang projek pemansang ke dilanggur iya kenyau nyadi kepala menteri dalam timpuh setaun enam bulan ke deka datai sereta jemah ila, kelimpah ari tim nya terus bejalaika projek ke udah diperambu tauka di padahka niang Tok Nan nyentuk ke abis timpuh lima taun.
Sekumbang timpuh kenyau bulan Januari 2017, kitai terus nampung nama utai ke dipejalaika Tok Nan sereta sekeda bisi diubah mimit ngambika kitai setipak enggau ubah ke diatu, dikena nentuka Sarawak nyadi nengeri mansang, ku iya.
“Sekumbang timpuh setaun enam bulan udah bejalaika ngagai menua pesisir enti enda saru ingat udah ngelawa 187 kandang endur di menua pesisir, kitai ngasaika kereban guna mensia mayuh patut diangkat tauka dikemanahka agi.
“Nama ke diperati sereta dipeda aku mayuh pekara ke patut diaduka kitai, nyengkaum di menua ulu. Aku meda isu ti pemadu balat diatu iya nya bekaul enggau bekal ai.
“Nya alai nama ke deka dipejalaika kitai iya nya ngemanahka bekal ai iya nya dalam timpuh pandak laban isu ai enda tau lubah kelebih agi ba kandang endur ke mayuh mensia enggau rumah panjai, lalu tu begunaka belanja besai ke alai kitai ngungkupka belanja perintah nengeri RM2 bilion.
“lalu dalam timpuh panjai dikena mutarka isu ai, kitai deka numbuhka grid ai nengeri ngena paip besai ti disambung ngagai genturung pendiau sereta rumah panjai nengah tekad ai kitai laban kitai mayuh tekad ai di nengeri tu,” ku iya.
Berebak enggau tu, iya mega madahka perintah nengeri mega deka chakah nyendiaka bekal elekterik awakka ulih ngubah kandang menua pesisir kelimpah ari nyambung menua pesisir enggau ulu ngena jalai alun.
Kelimpah ari nya lebuh ke nyaut tanya raban pengarang berita ba sesi tanya saut, iya madahka pengawa ngaga renggat keterubah jalai tebing pantai nengeri tu berengkah tengah taun 2019.
“Tinda projek tu udah dipansutka sereta lebuh mang- gai tengah taun baru, renggat keterubah projek tu (jalai tebing pantai) deka berengkah dipejalaika,” ku iya.
Iya madahka projek jalai pesisir nya nyengkaum pengawa ngaga jematan iya nya Krian, Muara Lassa, Saribas, Kuala Paloh enggau Batang Rajang, ti dipelanja perintah nengeri magang.
Tiga projek jematan ke bukai deka nyambungka jalai tebing pantai iya nya Rambungan, Igan enggau Batang Lupar.
Sama bisi datai ba program nya, dua Sapit Kepala Menteri Datuk Amar Douglas Uggah Embas sereta Masing; Sekretari Perintah Nengeri Tan Sri Datuk Amar Mohamad Morshidi Abdul Ghani; Menteri Muda ba Opis Kepala Menteri (Undang-Undang, Kaul Perintah Nengeri - Besai enggau Matau Projek) Sharifah Hasidah Sayeed Aman Ghazali sereta Menteri Muda ba Opis Kepala Menteri (Pekara Korporat) Abdullah Saidol.