Isu royalti minyak patut diputarka nengah chara profesional
KUCHING: Isu bekaul enggau royalti minyak ukai patut diputarka ngena chara politik tang patut diputarka nengah chara profesional.
Kepala Menteri Datuk Patinggi Abang Johari Tun Openg madahka ke diatu isu nya benung dikerandauka dua entiti iya nya Petronas enggau Petros ti ngarika hak Sarawak.
“Ke patut kitai nyerahka isu tu ngagai profesional awakka diputuska ngena chara profesional lalu patut ngurangka politik lebuh berandauka pekara tu.
“Aku enggai ngenang panjai pekara tu laban diatu benung dikerandauka entara Petros enggau Petronas. Lalu asil pemutus nya deka dipadahka ngagai perintah nengeri enggau perintah besai,” ku iya.
Abang Johari mansutka pekara nya dalam sesi tanya saut nyerumba program CM Jo Begulai Enggau Media - ‘The Way Forward’, ti diatur ba sebuah hotel ditu, lemai kemari.
Iya bepenemu isu royalti nya patut dikerandauka renggat kabinet, lalu siku ari Sarawak ke dalam kabinet perintah besai iya nya Menteri Kereja Raya, Baru Bian.
“Orang ke dalam kabinet diatu iya nya Baru Bian, laban dibaruh sistem perintah besai sapit menteri ukai kaban kabinet, semina menteri penuh aja kaban kabinet,” ku iya.
Taja pia Abang Johari madahka Sarawak enda beginsit ari peminta hak baka ke ditulis dalam Sempekat Malaysia 1963, Konstitusyen Perintah Besai enggau Konstitusyen Nengeri.
Bekaul enggau hak ba minyak iya madahka, perintah nengeri minta royalti minyak bepelasarka asil lalu ukai ari untung.
Bekaul enggau peminta kitai sereta pengeliat perintah besai, aku ngasaika enda kelalu tusah minta, keterubah kededua perintah nitihka undang-undang, ku iya.
“PH madah nitihka undang-undang, kitai perintah nengeri pan madahka nitihka undang-undang, lalu nya alai dikena nentuka hak nya kitai patut nitihka undang-undang, ngagai sempekat ke udah bisi iya nya Sempekat Malaysia, Konstitusyen Malaysia enggau Konstitusyen Nengeri, tu ke nyadi pelasar kitai.
“Tang kitai tetap enggau hak kitai, enda kurang enda lebih,” ku iya.
Sama bisi datai ba program nya, dua Sapit Kepala Menteri Datuk Amar Douglas Uggah Embas sereta Masing; Sekretari Perintah Nengeri Tan Sri Datuk Amar Mohamad Morshidi Abdul Ghani; Menteri Muda ba Opis Kepala Menteri (Undang-Undang, Kaul Perintah Nengeri - Besai enggau Matau Projek) Sharifah Hasidah Sayeed Aman Ghazali sereta Menteri Muda ba Opis Kepala Menteri (Pekara Korporat) Abdullah Saidol.