Bobby: PH,GPS sama deka beambi ulih ba hak Sarawak

KUCHING: Parti Bansa Dayak Sarawak Baru (PBDS) minta rayat Sarawak nulak gempung parti ari Semenanjung enggau Gabungan Parti Sarawak (GPS) laban kededua nya semina deka beambi ulih ba hak Sarawak ti nyadi pelasar ungkup pemerat politik sida.

Ketuai penerang parti nya, Bobby William pechayaka pilih ti patut ngagai peranak Sarawak iya nya Gempung Sarawak Baru, ti deka ditumbuh bala parti penyakal nengeri Sarawak.

Ku iya, enda baka PH enggau GPS, kaban ari Sarawak Baru ukai semina lurus ba pengawa negika hak peranak Sarawak ti udah bisi dalam Sempekat Malaysia 1963 (MA63) tang mega hak ekslusif rayat Sarawak ngambika ngempu tanah sida.

Ku Bobby, dalam kandang beberapa bulan ke udah, penerang royalti minyak enggau gis ari PH enggau GPS udah baka gaya ti ‘nulak enggau matak’.

Iya nuduh bala ketuai PH Sarawak udah ngaga pengilap ke sama baka Barisan Nasional (BN) ari Sarawak dulu suba ti enggau setujuka Akta Pemansang Petroleum 1974 (PDA74) lalu ngasuh minyak enggau gis Sarawak napi pemar sereta mega chukai bejual semua nya diempu perintah besai, ke alai sida terang ba pekara nya.

Ku iya, PH Sarawak sedia bebatak asur enggau hak Sarawak ari pinta sida ti dikumbai ‘ new deal’, datai enggau pinta enggau penetap, seraya pengawa perintah nengeri neritka Ordinan Ngelumbung Minyak (OMO 1954 ) berengkah ari 1 Julai 2018, diperati udah laun.

Ku iya, pemuntan exMenteri Besai Najib Razak enggau Kepala Menteri Datuk Patinggi Abang Johari Tun Openg mutarka isu nya mega meri empas enda manah ngagai Sarawak.

Bobby nyemetak madah bepelasarka pekara di atas, PH enggau GPS nyata ukai perintah lurus ti manah, madahka orchestra politik sida semina bepelasarka main politik sida aja ngelaburka mata rayat lalu udah nya beambi ulih ari pemansut asal Sarawak.

“Uji kitai beratika pekara nyadi peranak Sarawak. Kitai minta nikika royalti minyak enggau gis tauka ‘whole enchilada’ ari hak autonomi Sarawak dalam MA63?

“Enti kitai dekaka MA63 tu dipebasa baka bakani nya dipesetuju sebedau pengawa numbuhka Malaysia, endaka kitai semina fokus ngagai tuju nya aja ari ke tekuing ngagai reti bukai ti tau ngachau fokus nya?” ku iya.

Bobby madahka tu pekara ti enda ulih dikenggai sereta mega ditemu Perintah Besai Malaysia ti ditumbuh enggau Sarawak bepelasarka kaban kunsi sebela lalu enda patut nyadi subordinat ti nundukka perintah Besai tauka Semenanjung.

Ku iya, ari pengawa nerima sebarang pinta ti engka tau ngachau pengawa ngaku hak autonomi Sarawak nyata mandangka pengelemi bala ketuai nengeri ari Sarawak, lebuh sida terus ngayanka diri sanggup, nerima tauka numbuhka sebarang ‘new deal offer’, ba belanja ‘hak autonomi Sarawak.”

Ku iya, Sarawak enda patut diberi baru lebuh au- tonomi menua tu empu ulih bejakuka iya empu, laban nya pun nyadi sebagi ari sempekat Malaysia rambau pengawa numbuhka .

“Ke amat, peranak Sarawak ngandalka bala ketuai nengeri Sarawak minta Perintah Besai meri pulai Autonomi Sarawak ngagai nengeri asal iya, baka lebuh Federasyen .

“Enda patut dipeda baka Sarawak minta pekara ti baru, tu pekara ti udah lama betangguh kenyau ari artikel 150 ‘proclamation of emergency’udah dibantai dalam bulan November 2011,” ku iya.

Bobby pechaya pekara ti dikeandalka tetiap peranak Sarawak ari bala ketuai nengeri enda minta sida ‘Minta’ hak Sarawak ngambi dipulai tang ‘Madah’ enggau ‘Ngasuh’ Perintah Besai mulaika baru hak Sarawak lebuh pengawa numbuhka Federasyen.

Ku iya, pengudah 55 taun ditumbuh, bala ketuai nengeri patut bisi lebih ari chukup pelajar ti dipelajar ngelama tu.

Iya asa madahka penusah, pemedis dilalai enggau mua tuchum peranak Sarawak, 55 taun ti udah, ngujungka mayuh agi pemedis ti chukup ditapi peranak Sarawak ti seruran ngingatka diri empu pekara udah diasaika sida, laban kelalu puas, kelalu lurus enggau mega sedia asur tu.

“Manah agi GPS mega patut berundingka diri empu enggau pekara ti dikereja sida di belakang lalu ukai semina beambi ulih ari isu MA63 ungkup pengelantang politik enggau kena sida idup laban semua peranak Sarawak diatu berati sereta nemu amat chara sida ‘trick or treat’.