Pekit nginti di FTAS ke-4 dipelabaka ulih matak lebih ari 150 mensia mayuh
KUCHING: Pekit nginti beserimbai enggau Festival Tagang Entarabansa Semadang (FTAS) ke-4 ke sekali tu dipelabaka ulih matak lebih ari 150 mensia mayuh ari menua tu empu enggau entarabansa ke bisi endar ati deka enggau pekit nginti nya.
Pengatur pekit nya, Krisnam Louis Sebod madahka pekit nya deka digaga di Sungai Semadang di Kampung Semadang, Borneo Heights, urung 40km ari Bandaraya Kuching, ti deka digaga kena 1 September tu.
Iya madah perais deka diberi ngagai tiga bengkah kategori, iya nya ikan ke diulih dulu, ikan ke pengabis besai sereta pengabis mayuh ikan ke deka di ulih sida maya pekit nya (nitihka pemerat ikan).
Iya madah, orang ke dulu agi bulih ikan maya pekit nya ila deka nerima mata duit RM100 enggau trupi, lalu pemenang ke teulihka ikan ke pengabis berat bela deka nerima mata duit RM100 enggau trupi.
“Champian ke bulih mayuh agi asil deka mai pulai mata duit RM500 enggau trupi, lalu lumur dua deka mai pulai RM300 enggau trupi lalu ke bulih lumur tiga deka mai pulai RM200 enggau trupi.
“Lalu nambah enggau nya, pengatur pekit tu mega bisi nyendiaka tujuh perais saguhati dalam penyampau RM50 seiku,” ku iya.
Iya nandu baru madahka yuran ngerijista diri empu enggau pekit tu, RM20 seiku/ siti ginti/dua iti mata ginti, lalu bayar enda tau enda digaga tekala nya.
“Ginti ke bisi tiga iti mata enda dikemendarka tang umpan deka diberi pechuma, lalu ikan ke di ulih sida iya agi meruan idup, lalu patut diserah ngagai akim ngambika ulih ditimbang,” ku iya.
Penyereta ke enda nitihka atur nya deka diketuka tekala nya, lalu yuran ke udah dibayar enda ulih dipulaika baru.
Krisnam madah penyereta dikemendar mai ikan ke diulih sida iya pulai tauka ngelepaska ikan nya baru ngagai sungai.
Iya madah pengawa ngerijista penyereta deka berengkah digaga ari pukul 7 pagi ngagai 9 pagi di balai mayuh guna di Kampung Semadang.
Mensia mayuh ke deka nemu pasal pekit tu enggau silik agi tau betanya ba Krisnam empu ba lumur talipaun 0109666416.
Atur pengawa bukai ke bisi bela digaga maya nya (ari 31 Ogos ngagai 2 Sept) nyengkaum ajat sereta pekit musik tradisional, pekit indu bajik Miss Tagang, pekit berapi, kayak, main bol, bejualka pemakai sereta pengawa pemandang.