Dr Teo ngarapka PBT meri kerejasama mutarka penanggul di Miri
MIRI: Kaban Parlimen (MP)Miri Dr Michael Teo gagit endar ati deka ngaga kerejasama strategik entara opis kandang menua ngemutarka penanggul ke ditapi mensia mayuh tauka bekunsika penemu sida enggau iya.
Lebuh bejaku ba atur pengawa makai lemai begulai enggau ketuai opis kandang menua (PBT) ditu, malam hari Satu tu tadi, Dr Teo madahka kerejasama entara semua PBT tu deka meri empas ke positif ke deka meri penguntung ngagai semua sida iya sereta mensia mayuh di Miri.
“Aku beratika sekeda mensia mayuh begunaka kitai nyaup sida iya kelebih agi sida ke diau di tebing sungai ke nadai ai tauka elektrik, ke nyadi penanggul kitai.
“Aku ngarapka kitai semua sepenemu, sejalai bekunsika pekara tu, ke ukai semina meri penguntung ngagai kitai aja, tang ngagai mensia mayuh, alai penanggul bansa tu patut dikemutarka,” ku iya.
Dr Teo mega ngambi peluang nya meri terima kasih ngagai ketuai opis Perintah ke bisi enggau ngulu pengawa makai lemai nya lalu ngarapka kerejasama bansa nya ulih digaga manah agi.
“Miri nyadi tebilang kelebih agi kes orang sakit ke ngelawa poliklinik dini hari dakam pukul 4 pagi ketegal berebutka lumur idar diri betemu enggau lutur. Lebuh pekara tu dipadah ngagai aku, sigi aku neda arap, tang semadi aku empu kia meda bisi sekeda nya udah datai dia ari pukul 3 pagi.
“Lebuh aku madah ngagai Menteri Pengerai pasal pekara tu, iya madah deka mantu aku ngemutarka pekara tu, lalu aku ngarapka ari saup tiap iku kitai, ngambika kitai ulih mujur ngaga pengawa tu enggau manah lalu ngaga Miri sitak menua ke lantang alai diau,” ku iya.
Atur pengawa makai lemai nya digulu ulih urung 50 iku ketuai opis perintah ari bemacham agensi Perintah.