Geran MRP meseti dikena memanah ungkup pemaik nembiak redak
MIRI: Geran Projek Mit Pemansang Menua Pesisir (MRP) perintah nengeri patut dikena memanah bejalaika aktiviti ti tau mai bala komuniti di menua nya mansang.
Menteri Muda Dagang Temuai, Seni enggau Main Asal, Datuk Lee Kim Shin madah beguna amat agih belanja nya dikena memanah pengudah disua ngagai sida.
Nitih ku iya, perintah chukup siruka pekara belanja, nya kebuah MRP diagih ninting taun dikena ngelempungka tating sida.
“MRP tu abis nadai ulih ngelempungka tating belanja serakup tauka komiti ti deka ngatur aktiviti,” ku iya lebuh pengawa nyuaka MRP di opis iya, bedau lama ti udah.
Serakup tauka komiti ti sebedau tu minta geran nya ari perintah nengeri patut nentuka program ti dilangkar dipejalai.
“Pengudah nerima bantu belanja, atur pengawa udah nya sida patut ngatur program ti nagit penyereta bala komuniti,” ku iya nerang.
Sepenyampau 31 serakup enggau komiti nerima chek MRP sida empu lalu kesemua penyampau bantu manggai RM245,000 di opis Lee ditu.
Kaban Kunsil Nengeri (ADUN) Senadin nya ngingatka bala penerima masukka chek ngagai bank ti diterima enggau jampat sebedau hari bulan abis.
Kebuah pia ku iya laban bisi sekeda penerima enda masukka chek ngagai bank nya dataika hari bulan abis lalu sida dipinta nganjung peminta baru ba taun udah nya.
“Sida nandu baru atur pengawa ti sama lalu nganti agih belanja baru, nya kebuah beguna amat chek nya dipasukka ke dalam bank pengudah diterima,” ku iya nerang.