Pekit berakit Festival Selangau deka diatur 7 nyentuk 9 September
SIBU: Pekit berakit deka diatur nyadi siti aktiviti Festival Selangau taun tu berengkah kena 7 ngagai 9 September sereta raban pengatur mantaika pengandal ulih matak tim ari luar Sibu ungkup pekit berakit nya.
“Kitai ngarapka pekit berakit tu deka meda bela pesereta ari luar Sibu.
“Tu ukai pekit diungkup ngagai peranak ari Selangau enggau Sibu aja,” pia ku Chairman Kaunsil Pelilih Menua Pesisir Sibu (SRDC) Sempurai Petrus Ngelai.
Opis tu ti bejalaika tanggungpengawa nyadi raban pengatur pengerami tu ke deka ngangkat pekit berakit nyadi batang pengerami sida.
“Aku pechaya enggau pemisi bala pesereta luar, pengerami tu deka richah enggau rami agi,” ku Sempurai madah ngagai pengarang berita rambau aum pengarang berita pengudah aum kaunsil kemari.
Nitih ku iya, tanggungpengawa komiti sereta pengawa ngelakuka pengerami tu udah digaga enggau Sapit Chairman Kaunsil Robert Lau Hui Yew ke dipadu nyadi chairman komiti.
“Komiti tu ti enda tau enda bisi ungkup festival ngambika ngerembai dalam sukut kualiti enggau sustainability, kelebih agi ba pekara belanja dikena melanja festival tiga hari berunggu nya,” ku Sempurai nerang.
Menteri Muda Nembiak enggau Lumba, Datuk Snowdan Lawan deka ngelepas pekit berakit ba endur meleka semak Rumah Saong di Selangau.
Maya pengerami tu, ku Sempurai, deka diatur ba laman puang enda jauh enggau begunan Giatmara Selangau ari endur sebedau tu di Pasar Selangau.
“Kitai ngarap ubah endur tu deka ngurangka penyekut trafik dalam Pasar Selangau,” ku iya.
Seraya ku iya, SRDC deka berandau enggau Kaunsil Pelilih Subis sereta Kaunsil Mengeri Miri ba pengawa sida ngemanahka servis diri.
“Kitai deka ngatur randau begulai enggau rayat ninting bulan, berengkah ari Ogos tu.
“Aku empu, sapit aku, sekretari SRDC, bala kaunsilor zon enggau bala ketuai seksyen deka datai.
“Semua timbal, langgur penemu enggau ripot digempung ari randau nya deka dipegulai lalu dianjung ngagai mayuh bengkah komiti gawa ngambika dipejurai ba aum kaunsil ninting bulan,” ku iya, nyemetak madahka sida deka ngerumban gawaka peminta nya.
Randau keterubah deka diatur di Sibu Jaya Food Court kena 11 Ogos, berengkah ari pukul 9 pagi nyentuk pukul 1 lemai.
Randau kedua di Pasar Selangau dalam bulan September.