SPR udah meri pemendar dokumen PRU14 Parlimen Miri dibuai

MIRI: Dokumen Pengawa Bepilih Besai ke-14 (PRU14) nyin tadi ungkup sitak Parlimen Miri udah dibuai kemari ba endur muai uras Kuala Baram.

Pengawa tu dipejalai bala petugas Komiti Pengawa Bepilih Besai (SPR) ke mega nyadi pemesai enggau staf Kaunsil Mengeri Miri (MBM) disempulang raban nyaga pengelikun bukai.

Semua dokumen ti dikena rambau PRU14 antara nya keretas undi dibuai pengudah nerima pemendar ari SPR sereta nadai sebarang petisyen mantah dikenatai raban parti politik ti bediri minta pilih.

Aktiviti tu dipun enggau pengawa ngali lubang ti endur muai keretas undi enggau dokumen bekaul enggau pengawa bepilih.

Semua keretas undi ti bisi ba peti pengelikun udah nya dibuai ke dalam lubang lima kaki penalam urung pukul 9.17 pagi sebedau dialit ngena tanah urung pukul 9.35 pagi.

Taja ujan bangat sereta bekabut, semua petugas SPR meruan bejalaika pengawa sida muai keretas undi nya.

Pengawa ngemendarka pengawa muai tu diberi SPR pengudah nadai petisyen mantah dibantaika chalun enggau parti politik ti bediri minta pilih pengudah 21 hari pemutus pengawa bepilih.

Lebuh bepilih tu tadi, Parlimen Miri meda penyandang iya, Dr Michael Teo mujur ngetanka penuduk nya ungkup penggal kedua.

Teo ngalahka chalun Barisan Nasional (BN) Datuk Sebastian Ting enggau majoriti 13,663 pengudah teulihka 35,739 undi dibida Ting ti semina bulih 22,076 undi.

Sama bisi datai pengari Menijar Pengawa Bepilih Parlimen Miri, Monica Lenya, Sekretari SUPP Piasau, Kaunsilor Karambir Singh ti ngarika ADUN Piasau, Datuk Sebastian Ting sereta kaban PKR Miri, Peter Bong.