Karim: Anang ngaga kereja ‘cincai’
MIRI: Opis Menteri Dagang Temuai, Seni, Main Asal, Nembiak Lumba enggau Main enda ngemendarka kereja ‘cincai’ ba pengawa nyendiaka perengkaguna kelas lumur satu perengkaguna dagang temuai enggau produk di nengeri tu.
Menteri Opis nya Datuk Abdul Karim Hamzah nukuka komitmen nya lebuh bejaku ngagai media pengudah bejadi 3rd Miri Malaysian Association of Tour and Travel Agents (MATTA) Fair 2018 di Emart Riam apin lama ke udah.
Meri projek ‘ Wireless Walk’ ba koridor dagang temuai semanjai jalai North Yu Seng di Miri nya siti ari chunto, ke alai projek nya beungkus RM3.36 milion ti dipelaba tembu dalam bulan Oktober taun tu,mantu ngemanahka rampa kandang endur nya ti lalu nyaup nger- embaika ekonomi pengempu kedai orang ke bejual dia.
“Taja pan bisi sekeda orang enda lantang ati enggau projek nya, tang projek ‘Wireless Walk’ nya mengkang digaga nitihka pelin.
“Udah tentu, kami enggaika kereja ‘cincai’ lalu aku dekaka projek tu digaga manah laban projek tu mandangka imej mengeri tu.”
Enti tembu ila, palan nya deka nyendiaka 66 iti palan bejual enggau lima trak nyual pemakai enggau ai irup.
Nengah konsep kontena, bansa bejual nya bisi nyendiaka ‘wifi’ enggau perengkaguna bukai ke patut.
Kelimpah ari nya, palan nya mega deka disikap enggau 12 iti agu lelaki enggau indu.
Ba pemandang MATTA nya, bisi 40 bansal bejual ke ngambi bagi ba tiga hari berunggu ke tembu ensanus.
Pemandang MATTA udah diaku nyadi pengerami besai ti nyendiaka pakej kemisi ke manah, penerebai, tikit benasit enggau ke buaki ngagai mensia mayuh.
Sama bisi datai Menteri Muda Dagang Temuai, Seni enggau Main Asal Datuk Lee Kim Shin.