Hak nengeri, royalti enda ulih dipejurai nengah aum pengarang berita aja
SIBU: Isu hak nengeri, royalti enggau bidang kuasa kandang menua enda ulih dipejurai semina nengah aum pengarang berita aja ari sapit menteri enggau ketuai penyakal nengeri, pia ku penemu Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah.
Ku iya, isu tu besai amat ngagai Kuala Lumpur enggau nengeri Sabah enggau Sarawak.
Iya merambu ngambika Chairman Pakatan Harapan (PH) Sarawak Chong Chieng Jen nadai ngembuan kuasa bejaku enggau ngarika perintah besai tauka Petronas.
Abdul Karim belalauka penerang dibantaika Chong di luar Parlimen di Kuala Lumpur kena Hari Satu tadia ke alai royalti minyak enggau gis deka meruan lima peratus, Sarawak deka nerima tambah 20 peratus untung minyak.
Nitih ku Chong, perintah besai PH udah ngubah semaya ari 20 peratus royalti minyak enggau gis ngagai Sarawak, pebgudah perintah Sarawak milih enda nerima leman ditetap dalam ‘ New Deal Agreement’ rambau Pengawa Bepilih Besai Ke-14 (GE14) nyin tadi.
Ku Chong nambah, semaya 20 peratus royalti minyak enggau gis ngagai Sarawak enggau 50 peratus ari asil chukai dikumpul di Sarawak deka dipulai ngagai nengeri datai enggau underlying condition – ke alai perintah Sarawak meseti bekenaka belanja ungkup pemansang pelajar enggau ngintu pengerai.
“Aku alit ati enggau temegah! Sapa YB Chong ti ngaga tawaran ngagai perintah nengeri ba pekara besai baka nya,” ku Abdul Karim nimbal.
“Isu hak nengeri, royalti enggau bidang kuasa wilayah pekara chukup besai ngagai KL enggau nengeri ari Sabah enggau Sarawak lalu enda ulih dipejurai semina nengah aum pengarang berita aja ari sapit menteri enggau ketuai penyakal nengeri.
“YB Chong ngerebut kuasa ari Menteri Besai (PM) lalu gawa baka iya bisi kuasa enggau kuasa ngarika perintah besai enggau Petronas.
“Iya nadai ngembuan Locus Standi tauka kuasa bejaku enggayu ngaroka perintah besai tauka Petronas.
Abdul Karim mega merambu ke alai Chong ngeleseyka diri empu lebuh iya ngaga langgur penemu keterubah iya pasal pekara ke sama dua minggu sebedau GE nyin tadi.
“Iya meseti ngumbai diri ti nyadi ketuai DAP di Sarawak, iya bisi kuasa ngarika perintah PH ba sebarang pekara bekaul enggau hak nengeri,” ku Abdul Karim.
Iya mega nandu, perintah nengeri enda deka ngemaruhka nama diri ngambika berandau, nimbal tauka berunding enggau tim MP ari nengeri ti megai kuasa ngambi ngarika perintah besai agi rapas.