Pengajar ti manah ulih ngadaka nembiak sekula ti bekualiti
BINTULU: Pengajar ti manah deka ngadaka nembiak sekula ti bekualiti, nya alai endang siti pematut semua raban pengajar seruran ngemanah tikas pengawa sida enggau penemau sereta pengelandik ti patut, pia ku Pemesai Pelilih Bintulu Mataip Sayu.
Ku iya, tanggngpengawa sida ngagai menua tu endang besai sereta mayuh penguji kelebih agi diatu kitai diau ba dunya ti nadai taka sentang teknologi penerang enggau komunikasyen.
“Kita endang napi penguji ti besai kelebih agi dalam dunya pelajar ke baru laban kita mega besemekih ba bidang pelajar renggat dunya enggau mayuh penemu ti patut diteresa,” ku iya bejaku lebuh Pengerami Ngintu Hari Pengajar Bagi Menua BIntulu 2018 ditu, kemari ti ngarika Residen Bintulu Jack Aman Luat.
Ku Mataip madah, nengah semua penguji sereta tagit ti tinggi ari apai indai enggau komuniti, pengawa ngajar diatu ukai siti pengawa ti nyamai.
“Kita ti nyadi pengajar, nyadi chunto ti manah dalam transfomasyen nempa modal mensia ngambika kompiten agi di renggat dunya,” ku iya nambah.
Beserimbai enggau nya, iya mega ngelalau semua apai indai iya nya pengawa ngajar tu ukai semina dilempaika ngagai pengajar aja, sida (apai indai) orang ti patut meri penemu pemun sereta personaliti ti positif ngagai bala anak ba renggat keterubah ti dibai ari rumah.
Ungkup pengajar, Mataip ngansak sida neruska pengawa ti manah sereta tanggungpengawa ti deka ngemansangka modal mensia ke menua tu nengah pengawa nyadi ketuai ti seruran bisi pemaru.
“Tanggungpengawa kita diatu iya nya nentuka modal mensia kitai ke diatu sereta ti deka datai ulih besemekih kelebih agi sentang ngulihka pengawa laban nya ti mandangka pemujur kitai ti nyadi peranak menua tu,” ku iya nambah.
Sama bisi meri jaku lalau maya nya Pemesai Pelajar Pelilih Bintulu Fred Entau ti madahka tiap hari iya nya hari pengajar.
“Tanggungpengawa kitai enda ngetu seagi servis kitai agi diguna.
“Kitai mih orang ti ngetanka transformasyen pelajar, lalu mayuh penguji ti deka ditapi kitai, aku endang andal ati ketegal bala pengajar kitai terus mantaika pengawa ti pemadu manah sida.
“Pengawa ngajar tu ukai semina siti pengawa aja tang mega meri servis ngagai mensia mayuh,” ku Fred.
Bemacham tanda basa servis udah diberi maya pengerami nya kelai meri basa ngagai raban pengajar ke tanggungpengawa sida ke udah ngemansangka modal mensia dalam kandang menua nya.
Pengawa ti pamadu besai digaga malam nya meri basa ‘Tokoh Guru’ ngagai pengajar pinchin Temenggong Rosli Kamaruddin ke ngenang pemanah pengawa iya pengelama tu.