Ungkup rebak baru kelebih agi nembiak sekula meretika sejarah Sarawak dikena nempa penyerakup ti nentuka pemansang nengeri
SIBU: Pengerami ngintu Hari Sarawak engkeman dikena mantai ngagai rebak baru lebih agi nembiak sekula bekaul enggau main asal sereta sejarah Sarawak.
Menteri Dagang Antarabansa enggau E-Dagang Dato Sri Wong Song Koh enggau tu minta rayat Sarawak begulai enggau pangan diri bela nyingkang ke mua nengah siti tim.
“Aram kitai bekempit ngemansangka menua kitai lalu bejadi juluk ati nyadi nyata,” pia ku iya madah maya Pengerami Ngintu Hari Merdeka Sarawak 2018 ke diatur Opis Residen Sibu ba Dewan Kompleks Islam ditu, kemari.
Awak tu mega dikena Wong ngansak mayuh agi gerempung ukai dikuasa perintah ( NGO) kelimpah mensia mayuh ke bukai ngambi bagi ba program dikena ngintu Hari Sarawak.
Ku iya, pengerintu ngintu Hari Sarawak tu dikena mai semua peranak Sarawak ngingatka budi aki ini kelia sereta silik agi nemu identiti diri ti nyadi anak Sarawak.
“Kelimpah ari nya, pengerami tu mega tau bendar ngerekaika ulah patriotisme ba kitai empu seraya kitai nyingkang mansang lalu ngetanka pengelikun,” ku iya madah baru.
Iya ti mega Kaban Kunsil Nengeri ( ADUN) Bawang Assan madahka sejarah Sarawak meseti ditemu genap iku peranak nengeri tu.
Ku iya, Sarawak dulu agi
Aram kitai bekempit ngemansangka menua kitai lalu bejadi juluk ati nyadi nyata. Dato Sri Wong Song Koh Menteri Dagang Antarabansa enggau E-Dagang
suba dipegai Sultan Brunei sebedau ba taun 1841, Kuching diasuh pegai British ti diarika Sir James Brooke ti nangkan ke nya James Brooke ngelar diri Rajah Sarawak.
“Maya Perang Dunya Kedua, Jipun mujur megai Sarawak tang ba taun 1946 sida nyerah diri lalu Sarawak nangkan ke nya dipegai British, nyadi sebagi ari koloni British,” pia ku iya bekunsi sejarah.
Wng madah, kena 22 Julai 1963, Sarawak mujur megai diri ari pegai British sebedau kena 16 September 1963 begulai enggau Malaya, Sabah enggau Singapo numbuhka Persekutuan Malaysia.
Berindik ari nya, iya sekali agi minta rayat Sarawak begulai manah enggau pangan diri enda ngira jalai pengarap enggau bansa.
Sama bela datai maya tu iya nya ADUN Dudong Datuk Tiong Thai King, Temenggong Stanley Geramong, Residen Sibu Charles Siaw, Sapit Residen Sibu Wong Hee Seng enggau Pemesai Opis Pelilih Sibu Awang Yusup Awang Mostapha.