Beri kerejasama enggau piak ti bekaul ke mutarka penanggul kuasa karan
MUKAH: Bala sida ti ngempu tanah kelebih agi di pelilih Matu patut meri kerejasama ngagai raban ngempu tanggungpengawa ke mutarka penanggul kuasa karan ti suah nyadi.
Kaban Kunsil Nengeri (ADUN) Jemoreng, Datuk Dr Juanda Jaya madahka sekeda raban enggai meri pemendar tiang api lama ba tanah diempu sida nya ditukar.
“Tiang api repuk patut ditukar lalu enda agi ulih nampung pemerat sereta enda setipak enggau peminta bekal kuasa karan kandang diatu di Pelilih Matu,” ku iya rambau atur pengawa Nangguh Pesta Matu 2018 kena Hari Minggu tu tadi.
Ku iya, pekara tu nadai kaul enggau pengawa dipejalaika perintah nengeri laban bisi sekeda raban nguji nuduh sida.
“Perintah nengeri udah komited pasal pekara tu tang pekara ngasuh sinu amat iya nya ke amat tu datai ari isu baka ti dipadah,” ku iya.
Nya alai iya minta peranak meri kerejasama ngagai raban sarikat megai tanggungpengawa ngerumban mutarka penanggul nya pulaika pemaik semua raban.
Penanggul tejanggal kuasa karan suah nyadi di pelilih Matu lalu tu dirikot nyadi nyauka ninting minggu.
Penanggul tu mega ngasuh aktiviti besehari sehari bala komuniti di pelilih menua nya.
Berebak enggau nya, Juanda meri terima kasih ngagai komitmen ti diberi ngagai Kepala Menteri Datuk Patinggi Abang Johari Tun Abang Openg ti udah mayuh ngemendarka projek sekalika mit tauka besai di sitak Igan enggau Matu.
Abang Johari mega ngamatka semya iya kandang dua bulan ke udah lebuh ba Igan bejalaika pengawa matau semua projek ti dikemendar.
Kepala Menteri nyadi temuai khas ba pengawa Nangguhka Pesta Matu 2018 ti digusung urung 5,000 kenyau ari iya berengkah diatur kena 26 nyentuk 29 Julai 2018 tu tadi di Pasar Matu.