Dalam KPM mayuh sub-sistem baka JPN ke ari baruh nya bisi sub-sistem PPD lalu udah nya sub-sistem sekula empu
KUCHING: Mayuh hirarki dalam sistem sekula deka nagang pejalai transformasyen ba sesebuah sekula.
Direktor Bahagian Pengurusan Sekolah Harian (BPSH), Shaari Osman madahka transformasyen sekula enda ulih dipejalaika ketegal bisi heraki lebuh bejalaika pengawa.
Ku iya, dalam KPM mayuh sub-sistem entara nya Opis Pelajar Nengeri (JPN) lalu ari baruh sub-sistem Opis Pelajar Pelilih Menua (PPD) udah nya sub-sistem sekula.
Suba kitai dalam paradigma ke alai sub-sistem nganti jaku gerah dulu sebedau ulih ngereja sebarang pekara, ku iya.
“Kitai meda mayuh sekula ti nyulut iya nya sekula ti dalam sub- sistem sida iya empu, lalu enda ibuh nganti padah tauka penerang ari orang atas.
“Tu mih ke digaga Yayasan Amir, sida enda ngelanggar atur tang ngasilka penemu baru ti setipak enggau subsistem sida dikena ngubah gaya dalam sekula nya enggau ngarapka ulih mansang tauka nyulut ukai semina ba akademik tang ngelui ari nya,” ku iya seraya madahka nya entara ke dipelajar ari Sekula Amanah.
Shaari mansutka pekara nya lebuh ke nutup Aum Besai Sekolah Amanah ke diatur ba sebuah hotel ditu, kemari.
Berindik ari pekara nya Shaari ngarapka sekula di serata menua tu dikearapka ulih neladan atur Sekula Amanah ke bisi di Malaysia, awakka setipak enggau ubah abad Ke-21.
Nya ngambika nembiak ukai semina nyulut ba akademik tang mega nyerangkung aspek bukai, ku iya.
Proses belajar ba Sekula Amanah bepelasarka konsep Belajar Abad ke21 ti mungkur aspek tusun penuduk nembiak dalam kelas sereta meransang penyereta nembiak dalam proses belajar.
Nambahka nya nembiak mega diansah penau enggau penemu nyadi ketuai ngena chara meri peluang ngatur aktiviti kediri empu ba renggat sekula, ti chukup mantu dalam pengawa ngerembaika pengulih sesiku nembiak.
“Aku ngarapka nama utai ke nyadi ba Sekula Amanah tu ulih diteladan bala bakih (pengajar) ba sekula bukai.
“Kitai temegah ati laban Yayasan Amir (YA) datai mantu mai transformasyen ti ukai semina beratka penemu enggau pengelandik aja tang sida berundingka chara baka ni nempa kreativiti enggau inovasyen ba bala nembiak,” ku iya.
Berebak enggau tu iya madahka diri temegah ati ngagai sektor peribit ti ukai semina mai belanja tang mai pengelandik transformasyen bilik kelas.
Ku iya, transformasyen bilik kelas ukai pekara ti mudah laban dikurung paradigma lama bepuluh taun lalu deka berubah pedagogi bilik kelas pekara ti mah diatur.
Nitih ku iya, mayuh ke udah nguji sebedau tu sereta mayuh polisi udah dipansutka dikena nentuka padagogi bilik kelas berubah ti diatur opis menteri nyengkaum enda ngerami pemutus UPSR enggau PT3 lalu polisi tu ngambika pengajar mekuh ukai semina ba akademik tang nyengkaum pemansang elemen bukai.
“Kitai ukai semina begunaka pemeri ba belanja tang mega ba penau baka ni kitai ulh ngaga transformasyen dalam bilik kelas, lalu tu mih utai ke dipejalaika YA ba sekula ke dalam kategori Sekula Amanah,” ku iya.
Kelimpah ari nya bepelasarka penerang berita aum besai Sekula Amanah 2018, diatu bisi 83 buah Sekula Amanah serata Malaysia ti mungkur 51 buah Sekula Primari enggau 32 buah Sekula Sekondari.
Program nya meraka 10 buah nengeri ari semina tikas penyulut baka Sekolah Beprestasi Tinggi, Sekolah Harian, Sekolah Orang Asli, Sekolah Vernakular, Sekolah Agama, Sekolah Kurang Murid enggau sekula dalam kandang endur FELDA ti mungkur urung 4,670 iku pengajar enggau 65,000 iku nembiak.
Aum besai Sekula Amanah 2018 dipasuk 780 iku penyereta enggau rambai jaku ‘Transformasyen Ngelui Garis Antara Menua’ nyadi pelasar bekunsi penemu enggau bala pegawai ari bagi ba KPM, Opis Pelajar Nengeri (JPN), opis pelajar pelilih menua ( PPD), pengajar, komuniti sereta nembiak bekunsi penyulut sereta penemu baru dikena ngemujurka agi program Sekolah Amanah.
Nambahka nya, aum besai nya mega nyengkaum pengari pengajar ari Fin-
Kitai meda mayuh sekula ti nyulut iya nya sekula ti dalam sub-sistem sida iya empu, lalu enda ibuh nganti padah tauka penerang ari orang atas. Shaari Osman Direktor BPSH
land ngambika bekunsi penemu enggau penelaba ngajar enggau belajar enggau bala pengajar ke ngulu aum nya.
Sama bisi datai ba pengermi nutup aum besai nya kemari Chairman Kaunsil Pemegai Pengarap Yayasan Amir, Raja Tan Sri Dato Seri Arshad Raja Tun Uda enggau ke bukai.