Ensera pejalai ruang bilik Sakamoto bebasikal ari nengeri tu ngagai KK
KUCHING: Empat iku ari ruang bilik ke datai ari Hyogo, Jepun deka ngaga pejalai sida iya ari Kuching ngagai Kota Kinabalu dalam kandang bulan tu, ngena basikal, ke nyadi sebagi ari ensera pejalai lapan taun meling dunya.
Ruang bilik Sakamotos ke betuaika ketuai ruang bilik nya tauka apai sida sebilik, Tatsu ke bisi pengerindu ngena basikal, ngarapka sida sebilik ulih ngasaika bemacham bansa peneleba, gaya pendiau sereta adat pesaka nengah penemuai sida sebilik enggau komuniti menua tu, maya pejalai sida menyanak ngena basikal tu ila.
Iya madah, anak lelaki iya, Kentaro, 7, enggau Kojiro, 5, ngarap bisi tetemuka jelu niti jalai, iya empu enggau bini iya, Yoshika deka nguji pemakai ari menua tu.
“Tang ke batang, kami enggau naka ulih deka betemu enggau mensia mayuh ari menua tu, kelebih agi ruang bilik ke bisi anak mit,” ku iya madah ngagai The Borneo Post ke bisi ngerandau iya ditu, bedau lama tu tadi.
Sida menyanak deka berengkah angkat kena hari Lima tu (3 Ogos) ngagai Pusa, urung penyauh bebasikal dalam 200-km. Ari Pusa nya ila, sida iya deka ngena perau ke Sibu, lalu udah nya ngena bas ari Sibu ke Miri, sebedau sida menyanak bebasikal baru mansa Brunei lalu terus ke KK.
“Kami enda tau enda datai di KK kena 29 Ogos tu, laban maya nya kami deka angkat pulai ke Jepun,” ku Tatsu.
Ruang bilik tu baru udah pulai dalam pejalai sida iya ngena basikal dalam kandang dua minggu ari Bhutan. Sebedau nya, sida menyanak bisi ngetu di Nepal dalam kandang sebulan, lalu Malaysia Timur tu palan alai ngetu ke penudi sida menyanak, ke dikelala enggau nama ensera ngena basikal, ‘The Sakamotos’ Great Six Continents Adventure’.
Tu taun ke-4 Tatsu bejalai meda menua ngena basikal enggau sida sebilik.
“Aku udah bejalai ngena basikal ngelingi dunya kediri, maya umur aku dalam kandang 20 taun enggau 30 taun. Dalam pengelama 4 taun aku kediri tauka maya enggau kami sebilik, 43 buah menua udah dipeda kami.
“Udah kami duai Yoshika jadi sepuluh taun tu ke udah, aku berunding baru nyangka agi ulih kami bejalai ngena basikal baru. Aku seruran berunding mai kami sebilik. Pama lama aku nguji mujuk bini aku, lalu lebuh udah bisi anak tu, kami mutuska deka bejalai baru berengkah ari maya musim panas.
“Maya bejalai enggau diri sebilik, peneleba nya enda sebaka. Bisi maya tusah tang ngerinduka ati,” ku iya.
Dalam taun 2015, ruang bilik ke agi biak endar tu udah bejalai ngagai Auckland, New Zealand alai pengelama sida iya bejalai nyangka bisi 3 bulan. Ba renggat kedua taun siti nangkan nya, sida menyanak bebasikal meda ‘ Unesco World Heritage’ nengah jalai Camino de Santiago di Spain sebedau bebasikal ke Portugal enggau Switzerland. Taun siti nyin tadi, sida menyanak ngagai Canada enggau Alaska.
Tatsu madahka sida iya milih bejalai/bebasikal di Malaysia Timur laban enda mayuh orang di Jepun nemu pasal Sarawak enggau Sabah.
“Mayuh orang nemu pasal Borneo, iya nya sebuah pulau, tang sida iya enda nemu endur ke patut digagai sida. Aku pan deka anak aku ngasaika peneleba mayuh macham adat pesaka ke ulih dipeda sida iya ditu,” ku iya.
Lebuh ngenang pulai baru maya sida sebilik bisi napi penanggul ngiga endur diau di New Zealand, Tatsu beratika entara kenang ke pengabis manah sereta pelajar maya bejalai, sida bisi betemu enggau sekeda mensia mayuh ke ngelaluka sida sebilik bemalam enggau sida iya.
“Seiku orang ke mansa kami lebuh tepedaka kami napi kabut alai kami enda ulih nirika kem kami. Iya mai kami pulai ngagai rumah iya, ke agi benung digaga maya nya, lalu ngemendarka kami diau dia. Kami gaga endar ati enggau bansa tulung bansa tu.
“Indai tuai nya bisi dua iku anak ke endang diajar di rumah (homeschooled), lalu iya madahka pemanah pengawa ke digaga iya, siti ari pelajar ke bala anak iya. nembiak meratika pengawa apai idnai lalu belajar ari nya.
“Kami enda nyangka gaya bansa nya, tang kami belajar ari peneleba nya,” ku iya.
Iya nandu baru madahka bala anak iya pan diperatika belajar nyadi orang ke siru.
“Yoshika nanya sida iya, nama digaga nuan lebuh meda orang kena penusah?
Ken nyaut madahka orang ke kena penduah nya tau diau enggau sida sebilik, lalu ba saut Ko, ku iya, orang ke kena tusah nya tau bemain enggau ayam iya.
“Kami enda kala ngajar sida iya bansa nya, tang sida iya meda lalu belajar ari peneleba nya.
“Aku ngepunka pengawa bansa tu, ari pengawa ke deka digaga aku ngelama tu, tang diatu udah bisi anak, aku pechaya pejalai kami tu nyadi pelajar lebuh sida iya empu ngasaika peneleba nya. Kitai ulih belajar mayuh macham bansa program ari TV enggau internet, tang enda telabanka peneleba ke amat,” ku iya.
Dalam kandang 4 taun udah tu ila, ngepunka “The Sakamotos’ Great Six Continents Adventure”, ruang bilimtu bedau mutuska pelin sida iya udah tu ila ke bisi ati deka ngelawa seraya bebasikal ngagai Africa, Amerika Selatan enggau sekeda bengkah menua Asia.
Mensia mayuh ke bisi ati deka nemu enggau silik agi pasal pejalai Sakamoto, tau meda pejalai sebilik nengah www.tatsuoffice.com tauka www. facebook. com/ tatsu. aroundtheworld.