Ungkup belanja RM1.5 juta enda ulih mutarka penusah ampuh bah tunggal di Lambir

MIRI: Sekeda sitak kandang menua baruh di konstitusyen parlimen Sibuti balat kena empas ampuh bah tunggal berindik ari ujan bangat ari pukul 10 malam hari Dua tu tadi ngagai pagi kemari.

Pekara nya ditetapka ulih Kaban Parlimen (MP) Lukanisman Awang Sauni lebuh iya nerima mayuh dawa sereta ripot ke madahka bisi ampuh bah tunggal nyadi pagi kemari.

Entara sitak ke kena penusah nya, iya nya Jalai Sibu Taman Tunku, PLKN Kem Sungai Rait, Kampung Kejapil enggau Jalai MiriBintulu (semak enggau Wong Lambir).

Lalu sama napi penusah nya, Kampung Bakam, enda jauh ari sitak Sungai Dalam, Tukau enggau Sekolah Agama Tukau, Miri enggau Rumah Aron Skim Sepupok.

“Taja pan kitai enda ulih nguasa ujan, aku ngaku sigi bisi sekeda sitak kena ampuh bah tunggal baka Taman Tunku ketegal sistem parit,” ku iya madah ngagai The Borneo Post kemari.

Nitihku Lukanisman, projek nagang penusah bah sereta ngenalamka agi sungai udah digaga enggau pemun ungkup RM1.5 juta tang agi enda ulih ngemutarka penusah nya.

“Aku enggau ADUN Lambir, Ripin Lamat deka baum lalu minta penemu sida ari Opis Entali Ai (DID)ngemutarka penanggul ampuh bah nya nengah ungkup RM10 juta ti baru udah dikemendar ulih Perintah Menua bedau lama tu tadi,” ku iya.

Lukanisman madahka projek nya lalu bedau dipunka laban agi benung dipejuraika lalu ngiga jalai ke pengabis manah ngemutarka penang- gul ampuh bah di Lambir.

“Mensia mayuh tauka pengguna jalai dilalau enda nengah sitak ke kena ampuh bah nya, nyeliah diri ari kena penusah bukai ke tau nganu pendiau sida iya,” ku iya.

Mensia mayuh ke kena penusah ampuh bah nya dipinta madah ngagai Opis Pelilih Menua Miri sereta Opis Kaunsil Miri (MCC), enti sida iya begunaka barang tulung.

Ba lansa pekara bekait enggau penusah nya, Ketuai Opis Bomba enggau Penyah Penusah ( Bomba) Law Poh Kiong madahka raban Bomba mega mantu mindahka mensia mayuh ke diau di Kampung Bakam ke bisi napi penanggul ampuh bah nya.

Ku iya, urung 10 buah rumah, ke nguan 57 diri sebilik dipindah ngena bot Bomba.